Maa Taramoyee

দশমঃ অধ্যায়ঃ

দশমঃ অধ্যায়ঃ ওঁ নমশ্চণ্ডিকায়ৈ। শুম্ভ বধ
মূল	পাঠ সংকেত
ঋষিরুবাচ।। ১ নিশুম্ভং নিহতং দৃষ্ট্বা ভ্রাতরং প্রাণসম্মিতম্‌। হন্যমানং বলঞ্চৈব শুম্ভঃ ক্রুদ্ধোগব্রবীদ্‌ বচঃ।। ২	ঋষিঃ উবাচ।। ১ নিশুম্ভং নিহতং দৃষ্ট্বা ভ্রাতরং প্রাণ-সম্মিতম্‌। হন্যমানং বলং চ এব শুম্ভঃ ক্রুদ্ধঃ অব্রবীৎ বচঃ।। ২
বলাবলেপদুষ্টে! ত্বং মা দুর্গে! গর্ব্বমাহব। অন্যাসাং বলমাশ্রিত্য যূধ্যসে যাহতিমানিনী।। ৩	বল-অবলেপ-দুষ্টে ত্বং মা দুর্গে গর্বম্‌ আহব। অন্যাসাং বলম্‌ আশ্রিত্য যূধ্যসে যা অতিমানিনী।। ৩
দেব্যুবাচ।। ৪ একৈবাহং জগত্যত্র দ্বিতীয়া কা মমাপরা। পশ্যৈতা দুষ্ট! ময্যেব বিশন্ত্যো মদ্‌বিভূতয়ঃ।। ৫	দেবী উবাচ।। ৪ একা এব অহম্‌ জগতি অত্র দ্বিতীয়া কা মম অপরা। পশ্য এতাঃ দুষ্ট ময়ি-এব বিশন্ত্যঃ মদ্‌বিভূতয়ঃ।। ৫
ততঃ সমস্তাস্তা দেব্যো ব্রহ্মাণীপ্রমুখা লয়ম্‌। তস্যা দেব্যাস্তনৌ জগ্মুরেকৈবাসীৎ তদাম্বিকা।। ৬	ততঃ সমস্তাঃ তা দেব্যঃ ব্রহ্মাণী-প্রমুখাঃ লয়ম্‌। তস্য দেব্যাঃ তনৌ জগ্মুঃ একা-এব-আসীৎ তদা-অম্বিকা।। ৬
দেব্যুবাচ।। ৭ অহং বিভূত্যা বহুভিরিহ-রূপৈর্যদাস্থিতা। তৎ সংহৃতং ময়ৈকৈব তিষ্ঠাম্যাজৌ স্থিরো ভব।। ৮	দেবী উবাচ।। ৭ অহং বিভূত্যা বহুভিঃ ইহ-রূপৈঃ যৎ আস্থিতা। তৎ সংহৃতম্‌ ময়া একা-এব তিষ্ঠামি আজৌ স্থিরঃ ভব।। ৮
ঋষিরুবাচ।। ৯ ততঃ প্রববৃতে যুদ্ধং দেব্যাঃ শুম্ভস্য চোভয়োঃ। পশ্যতাং সর্ব্বদেবানামসুরাণাঞ্চ দারুণম্‌।। ১০	ঋষিঃ উবাচ।। ৯ ততঃ প্রববৃতে যুদ্ধম্‌ দেব্যাঃ শুম্ভস্য চ উভয়োঃ। পশ্যতাং সর্ব-দেবানাম্‌ অসুরাণাম্‌ চ দারুণম্‌।। ১০
শরবর্ষৈঃ শিতৈঃ শস্ত্রৈস্তথাস্ত্রৈশ্চৈব দারুণৈঃ। তয়োর্যুদ্ধমভূদ্‌ ভূয়ঃ সর্ব্বলোকভয়ঙ্করম্‌।। ১১	শর-বর্ষৈঃ শিতৈঃ শস্ত্রৈঃ তথা অস্ত্রৈঃ চ এব দারুণৈঃ। তয়োঃ যুদ্ধম্‌ অভূৎ ভূয়ঃ সর্ব-লোক-ভয়ঙ্করম্‌।। ১১
দিব্যান্যস্ত্রাণি শতশো মুমুচে যান্যথাম্বিকা। বভঞ্জ তানি দৈত্যেন্দ্রস্তৎপ্রতীঘাত-কর্ত্তৃভিঃ।। ১২	দিব্যানি অস্ত্রাণি শতশঃ মুমুচে যানি অথ বভঞ্জ তানি দৈত্য ইন্দ্রঃ তৎ-প্রতীঘাত-কর্তৃভিঃ।। ১২
মুক্তানি তেন চাস্ত্রাণি দিব্যানি পরমেশ্বরী। বভঞ্জ লীলয়ৈবোগ্র-হুঙ্কারোচ্চারণাদিভিঃ।। ১৩	মুক্তানি তেন চ অস্ত্রাণি দিব্যানি পরমেশ্বরী। বভঞ্জ লীলয়া এব উগ্র-হুঙ্কার-উচ্চারণ-আদিভিঃ।। ১৩
ততঃ শরশতৈর্দেবীমাচ্ছাদয়ত সোহসুরঃ। সাপি তৎ কুপিতা দেবী ধনুশ্চিচ্ছেদ চেষুভিঃ।। ১৪	ততঃ শর-শতৈঃ দেবীম্‌ আচ্ছাদয়ত সঃ অসুরঃ। সা অপি তৎ কুপিতা দেবী ধনুঃ চিচ্ছেদ চ ইষুভিঃ।। ১৪
ছিন্নে ধনুষি দৈত্যেন্দ্রস্তথা শক্তিমথাদদে। চিচ্ছেদ দেবী চক্রেণ তামপ্যস্য করস্থিতাম্‌।। ১৫	ছিন্নে ধনুষি দৈত্য-ইন্দ্রঃ তথা শক্তিম্‌ অথ আদদে। চিচ্ছেদ দেবী চক্রেণ তাম্‌ অপি অস্য কর-স্থিতাম্‌।। ১৫
ততঃ খড়্‌গমুপাদায় শতচন্দ্রঞ্চ ভানুমৎ। অভ্যধাবত্তদা দেবীং দৈত্যানামধিপেশ্বরঃ।। ১৬	ততঃ খড়্‌গম্‌ উপাদায় শত-চন্দ্রম্‌ চ ভানুমৎ। অভ্যধাবৎ তদা দেবীং দৈত্যানাম্‌ অধিপ-ঈশ্বরঃ।। ১৬
তস্যাপতত এবাশু খড়্গং চিচ্ছেদ চণ্ডিকা। ধনুর্ম্মুক্তৈঃ শিতৈর্ব্বাণৈশ্চর্ম্ম চার্ককরামলম্‌।। ১৭	তস্য আপততঃ এব আশু খড়্গং চিচ্ছেদ চণ্ডিকা। ধনুঃ মুক্তৈঃ শিতৈঃ বাণৈঃ চর্ম চ অর্ক-কর-অমলম্‌।। ১৭
হতাশ্বঃ স তদা দৈত্যশ্ছিন্নধন্বা বিসারথিঃ। জগ্রাহ মুদ্গরং ঘোরমম্বিকা-নিধনোদ্যতঃ।। ১৮	হত-অশ্বঃ স তদা দৈত্যঃ ছিন্ন-ধন্বা বি-সারথিঃ। জগ্রাহ মুদ্গরং ঘোরম্ অম্বিকা-নিধন-উদ্যতঃ।। ১৮
চিচ্ছেদাপততস্তস্য মুদ্গরং নিশিতৈঃ শরৈঃ। তথাপি সোহভ্যধাবত্তাং মুষ্টিমুদ্যম্য বেগবান্‌।। ১৯	চিচ্ছেদ আপততঃ তস্য মুদ্‌গরং নিশিতৈঃ শরৈঃ। তথা অপি সঃ অভ্যধাবৎ তাম্‌ মুষ্টিম্‌ উদ্যম্য বেগবান্‌।। ১৯
স মুষ্টিং পাতয়ামাস হৃদয়ে দৈত্যপুঙ্গবঃ। দেব্যাস্তঞ্চাপি সা দেবী তলেনোরস্যতাড়য়ৎ।। ২০	সঃ মুষ্টিং পাতয়ামাস হৃদয়ে দৈত্য-পুঙ্গবঃ। দেব্যাঃ তম্‌ চ অপি সা দেবী তলেন উরসি অতাড়য়ৎ।। ২০
তলপ্রহারাভিহতো নিপপাত মহীতলে। স দৈত্যরাজঃ সহসা পুনরেব তথোত্থিতঃ।। ২১	তল-প্রহার-অভিহতঃ নিপপাত মহী-তলে। সঃ দৈত্যরাজঃ সহসা পুনঃ এব তথা উত্থিতঃ।। ২১
উৎপত্য চ প্রগৃহ্যোচ্চৈর্দ্দেবীং গগনমাস্থিতঃ। তত্রাপি সা নিরাধারা যুযুুধে তেন চণ্ডিকা।। ২২	উৎপত্য চ প্রগৃহ্য উচ্চৈঃ দেবীং গগনম্‌ আস্থিতঃ। তত্র অপি সা নিঃ-আধারা যুযুুধে তেন চণ্ডিকা।। ২২
নিযুদ্ধং খে তদা দৈত্যশ্চণ্ডিকা চ পরস্পরম্‌। চক্রতুঃ প্রথমং সিদ্ধ-মুনিবিস্ময়কারকম্‌।। ২৩	নিযুদ্ধং খে তদা দৈত্যঃ চণ্ডিকা চ পরস্পরম্‌। চক্রতুঃ প্রথমং সিদ্ধ-মুনি-বিস্ময়-কারকম্‌।। ২৩
ততো নিযুদ্ধং সুচিরং কৃত্বা তেনাম্বিকা সহ। উৎপাত্য ভ্রাময়ামাস চিক্ষেপ ধরণীতলে।। ২৪	ততঃ নিযুদ্ধং সু-চিরং কৃত্বা তেন অম্বিকা সহ। উৎপাত্য ভ্রাময়ামাস চিক্ষেপ ধরণীতলে।। ২৪
স ক্ষিপ্তো ধরণীং প্রাপ্য মুষ্টিমুদ্যম্য বেগতঃ। অভ্যধাবত দুষ্টাত্মা চণ্ডিকানিধনেচ্ছয়া।। ২৫	সঃ ক্ষিপ্তঃ ধরণীং প্রাপ্য মুষ্টিম্‌ উদ্যম্য বেগতঃ। অভ্যধাবত দুষ্ট-আত্মা চণ্ডিকা-নিধন-ইচ্ছয়া।। ২৫
তমায়ান্তং ততো দেবী সর্ব্বদৈত্যজনেশ্বরম্‌। জগত্যাং পাতয়ামাস ভিত্ত্বা শূলেন বক্ষসি।। ২৬	তম্‌ আয়ান্তং ততঃ দেবী সর্ব-দৈত্য-জন-ঈশ্বরম্‌। জগত্যাং পাতয়ামাস ভিত্ত্বা শূলেন বক্ষসি।। ২৬
স গতাসু পপাতোর্ব্ব্যাং দেবীশূলাগ্র-বিক্ষতঃ। চালয়ন্‌ সকলাং পৃথ্বীং সাব্ধিদ্বীপাং সপর্ব্বতাম্‌।। ২৭	সঃ গত-অসুঃ পপাত উর্ব্যাং দেবী-শূল-অগ্র-বিক্ষতঃ। চালয়ন্‌ সকলাং পৃথ্বীং স-অব্ধি-দ্বীপাং স-পর্বতাম্‌।। ২৭
ততঃ প্রসন্নমখিলং হতে তস্মিন্‌ দুরাত্মনি। জগৎ স্বাস্থ্যমতীবাপ নির্ম্মলঞ্চাভবন্নভঃ।। ২৮	ততঃ প্রসন্নম্‌ অখিলং হতে তস্মিন্‌ দুরাত্মনি। জগৎ স্বাস্থ্যম্ অতীব আপ নির্মলম্ চ অভবৎ নভঃ।। ২৮
উৎপাতমেঘাঃ সোল্কা যে প্রাগাসংস্তে শমং যযুঃ। সরিতো মার্গবাহিন্যস্তথাসংস্তত্র পাতিতে।। ২৯	উৎপাত-মেঘাঃ স-উল্কাঃ যে প্রাক্‌ আসন্‌ তে শমং যযুঃ। সরিতঃ মার্গ-বাহিন্যঃ তথা আস্‌ন তত্র পাতিতে।। ২৯
ততো দেবগণাঃ সর্ব্বে হর্ষনির্ভর-মানসাঃ। বভূবুর্নিহতে তস্মিন্‌ গন্ধর্ব্বা ললিতং জগুঃ।। ৩০	ততঃ দেবগণাঃ সর্বে হর্ষ-নির্ভর-মানসাঃ। বভূবুঃ নিহতে তস্মিন্‌ গন্ধর্বাঃ ললিতং জগুঃ।। ৩০
অবাদয়ংস্তথৈবান্যে ননৃতুশ্চাপ্সরোগণাঃ। ববুঃ পুণ্যাস্তথা বাতাঃ সুপ্রভোহভূদ্‌ দিবাকরঃ।। ৩১	অবাদয়ন্‌ তথা এব অন্যে ননৃতুঃ চ অপ্সরোগণাঃ। ববুঃ পুণ্যাঃ তথা বাতাঃ সু-প্রভঃ অভূৎ দিবা-করঃ।। ৩১
জজ্বলুশ্চাগ্নয়ঃ শান্তাঃ শান্তদিগ্জনিতস্বনাঃ।। ৩২	জজ্বলুঃ চ অগ্নয়ঃ শান্তাঃ শান্ত-দিক্-জনিত-স্বনাঃ।। ৩২
ইতি মার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে শুম্ভবধঃ।। ১০ম অঃ।।