Maa Taramoyee

একাদশঃ অধ্যায়ঃ

একাদশঃ অধ্যায়ঃ ওঁ নমশ্চণ্ডিকায়ৈ। নারায়ণীস্তুতি
মূল	পাঠ সংকেত
ঋষিরুবাচ।। ১ দেব্যা হতে তত্র মহাসুরেন্দ্রে, সেন্দ্রাঃ সুরা বহ্নিপুরোগমাস্তাম্‌। কাত্যায়নীং তুষ্টুবুরিষ্টলম্ভাদ্‌ বিকাশিবক্ত্রাস্তু বিকাসিতাশাঃ।। ২	ঋষিঃ উবাচ।। ১ দেব্যা হতে তত্র মহা-অসুর-ইন্দ্রে, স-ইন্দ্রাঃ সুরাঃ বহ্নি-পুরঃ-গমাঃ তাম্‌। কাত্যায়নীং তুষ্টুবুঃ ইষ্ট-লম্ভাৎ বিকাশিবক্ত্রাঃ তু বিকাসিত-আশাঃ।। ২
দেবি প্রপন্নার্ত্তিহরে প্রসীদ, প্রসীদ মাতর্জ্জগতোহখিলস্য। প্রসীদ বিশ্বেশ্বরী পাহি বিশ্বং, ত্বমীশ্বরী দেবি চরাচরস্য।। ৩	দেবি প্রপন্ন-আর্তি-হরে প্রসীদ, প্রসীদ মাতঃ জগতঃ অখিলস্য। প্রসীদ বিশ্ব-ঈশ্বরী পাহি বিশ্বং, ত্বম্‌ ঈশ্বরী দেবি চর-আচরস্য।। ৩
আধারভূতা জগতস্ত্বমেকা, মহীস্বরূপেণ যতঃ স্থিতাসি। অপাং স্বরূপস্থিতয়া ত্বয়ৈত- দাপ্যায্যতে কৃৎস্নমলঙ্ঘ্যবীর্য্যে।। ৪	আধার-ভূতা জগতঃ ত্বম্‌ একা, মহী-স্বরূপেণ যতঃ স্থিতা অসি। অপাং স্বরূপ-স্থিতয়া ত্বয়া এতৎ আপ্যায্যতে কৃৎস্নম্‌ অলঙ্ঘ্য-বীর্যে।। ৪
ত্বং বৈষ্ণবী-শক্তিরনন্তবীর্য্যা, বিশ্বস্য বীজং পরমাসি মায়া। সন্মোহিতং দেবি সমস্তমেতৎ, ত্বং বৈ প্রসন্না ভুবি মুক্তিহেতুঃ।। ৫	ত্বম্‌ বৈষ্ণবী-শক্তিঃ অনন্ত-বীর্যা, বিশ্বস্য বীজং পরমা অসি মায়া। সন্মোহিতং দেবি সমস্তম্‌ এতৎ, ত্বং বৈ প্রসন্না ভুবি মুক্তি-হেতুঃ।। ৫
বিদ্যাঃ সমস্তাস্তব দেবি ভেদাঃ, স্ত্রিয়ঃ সমস্তাঃ সকলা জগৎসু। ত্বয়ৈকয়া পূরিতমম্বয়ৈতৎ, কা তে স্তুতিঃ স্তব্যপরাপরোক্তিঃ।। ৬	বিদ্যাঃ সমস্তাঃ তব দেবি-ভেদাঃ, স্ত্রিয়ঃ সমস্তাঃ স-কলাঃ জগৎসু। ত্ব ত্বয়া একয়া পূরিতম্ অম্বয়া এতৎ, কা তে স্তুতিঃ স্তব্য-পর-অপর-উক্তিঃ।। ৬
সর্ব্বভূতা যদা দেবী স্বর্গমুক্তিপ্রদায়িনী। ত্বং স্তুতা স্তুতয়ে কা বা ভবন্তু পরমোক্তয়ঃ।। ৭	সর্বভূতা যদা দেবী স্বর্গ-মুক্তি-প্রদায়িনী। ত্বং স্তুতা স্তুতয়ে কা বা ভবন্তু পরম-উক্তয়ঃ।। ৭
সর্ব্বস্য বুদ্ধিরূপেণ জনস্য হৃদি সংস্থিতে। স্বর্গাপবর্গদে দেবি নারায়ণি নমোহস্তু তে।। ৮	সর্বস্য বুদ্ধি-রূপেণ জনস্য হৃদি সংস্থিতে। স্বর্গ-অপবর্গ-দে দেবি নারায়ণি নমঃ অস্তু তে।। ৮
কলাকাষ্ঠাদিরূপেণ পরিণামপ্রদায়িনি। বিশ্বস্যোপরতৌ শক্তে নারায়ণি নমোহস্তু তে।। ৯	কলা-কাষ্ঠা-আদি-রূপেণ পরিণাম-প্রদায়িনি। বিশ্বস্য উপরতৌ শক্তে নারায়ণি নমঃ অস্তু তে।। ৯
সর্ব্বমঙ্গল-মঙ্গল্যে শিবে সর্ব্বার্থসাধিকে। শরণ্যে ত্র্যম্বকে গৌরি নারায়ণি নমোহস্তু তে।। ১০	সর্ব-মঙ্গল-মঙ্গল্যে শিবে সর্ব-অর্থ-সাধিকে। শরণ্যে ত্রি-অম্বকে গৌরি নারায়ণি নমঃ অস্তু তে।। ১০
সৃষ্টি-স্থিতি-বিনাশানাং শক্তিভূতে সনাতনি। গুণাশ্রয়ে গুণময়ে নারায়ণি নমোহস্তু তে।। ১১	সৃষ্টি-স্থিতি-বিনাশানাং শক্তি-ভূতে সনাতনি। গুণ-আশ্রয়ে গুণময়ে নারায়ণি নমঃ অস্তু তে।। ১১
শরণাগত-দীনার্ত্ত-পরিত্রাণ-পরায়ণে। সর্ব্বস্যার্ত্তিহরে দেবী নারায়ণি নমোহস্তু তে।। ১২	শরণ-আগত-দীন-আর্ত-পরিত্রাণ-পর-অয়ণে। সর্বস্য আর্তি-হরে দেবী নারায়ণি নমঃ অস্তু তে।। ১২
হংসযুক্ত-বিমানস্থে ব্রহ্মাণী-রূপধারিণি। কৌশাম্ভঃক্ষরিকে দেবি নারায়ণি নমোহস্তু তে।। ১৩	হংস-যুক্ত-বিমানস্থে ব্রহ্মাণী-রূপ-ধারিণি। কৌশ-অম্ভঃ-ক্ষরিকে দেবি নারায়ণি নমঃ অস্তু তে।। ১৩
ত্রিশূল-চন্দ্রাহি-ধরে-মহাবৃষভ-বাহিনি। মাহেশ্বরী-স্বরূপেন নারায়ণি নমোহস্তু তে।। ১৪	ত্রিশূল-চন্দ্র-অহি-ধরে-মহা-বৃষভ-বাহিনি। মাহেশ্বরী-স্বরূপেন নারায়ণি নমঃ অস্তু তে।। ১৪
ময়ূরকুক্কুটবৃতে মহাশক্তি-ধরেহনঘে। কৌমারী-রূপসংস্থানে নারায়ণি নমোহস্তু তে।। ১৫	ময়ূর-কুক্কুট-বৃতে মহাশক্তি-ধরে অনঘে। কৌমারী-রূপ-সংস্থানে নারায়ণি নমঃ অস্তু তে।। ১৫
ময়ূর-কুক্কুট-বৃতে মহাশক্তি-ধরে অনঘে। কৌমারী-রূপ-সংস্থানে নারায়ণি নমঃ অস্তু তে।। ১৫	শঙ্খ-চক্র-গদা-শার্ঙ্গ-গৃহীত-পরম-আয়ুধে। প্রসীদ বৈষ্ণবী-রূপে নারায়ণি নমঃ অস্তু তে।। ১৬
গৃহীতোগ্র-মহাচক্রে দংষ্ট্রোদ্ধৃত-বসুন্ধরে। বরাহরূপিণি শিবে নারায়ণি নমোহস্তু তে।। ১৭	গৃহীত-উগ্র-মহাচক্রে দংষ্ট্রা-উদ্ধৃত-বসুন্ধরে। বরাহ-রূপিণি শিবে নারায়ণি নমঃ অস্তু তে।। ১৭
নৃসিংহ-রূপেণোগ্রেণ হন্তুং দৈত্যান্‌ কৃতোদ্যমে। ত্রৈলোক্য-ত্রাণসহিতে নারায়ণি নমোহস্তু তে।। ১৮	নৃ-সিংহ-রূপেণ-উগ্রেণ হন্তুং দৈত্যান্‌ কৃত-উদ্যমে। ত্রৈলোক্য-ত্রাণ-সহিতে নারায়ণি নমঃ অস্তু তে।। ১৮
কিরীটিনি মহাবজ্রে সহস্রনয়নোজ্জ্বলে। বৃত্রপ্রাণহরে চৈন্দ্রি নারায়ণি নমোহস্তু তে।। ১৯	কিরীটিনি মহাবজ্রে সহস্র-নয়ন-উজ্জ্বলে। বৃত্র-প্রাণহরে চ ঐন্দ্রি নারায়ণি নমঃ অস্তু তে।। ১৯
শিবদূতী-স্বরূপেন হতদৈত্য-মহাবলে। ঘোররূপে মহারাবে নারায়ণি নমোহস্তু তে।। ২০	শিবদূতী-স্বরূপেন হত-দৈত্য-মহাবলে। ঘোররূপে মহা-আরাবে নারায়ণি নমঃ অস্তু তে।। ২০
দংষ্ট্রা-করালবদনে শিরোমালা-বিভূষণে। চামুণ্ডে মুণ্ডমথনে নারায়ণি নমোহস্তু তে।। ২১	দংষ্ট্রা-করাল-বদনে শিরঃ-মালা-বিভূষণে। চামুণ্ডে মুণ্ড-মথনে নারায়ণি নমঃ অস্তু তে।। ২১
লক্ষ্মি লজ্জে মহাবিদ্যে শ্রদ্ধে পুষ্টি স্বধে ধ্রুবে। মহারাত্রি মহামায়ে নারায়ণি নমোহস্তু তে।। ২২	লক্ষ্মি লজ্জে মহাবিদ্যে শ্রদ্ধে পুষ্টি স্বধে ধ্রুবে। মহারাত্রি মহামায়ে নারায়ণি নমঃ অস্তু তে।। ২২
মেধে সরস্বতি বরে ভূতি বাভ্রবি তামসি। নিয়তে ত্বং প্রসীদেশে নারায়ণি নমোহস্তু তে।। ২৩	মেধে সরস্বতি বরে ভূতি বাভ্রবি তামসি। নিয়তে ত্বং প্রসীদ ঈশে নারায়ণি নমঃ অস্তু তে।। ২৩
সর্ব্বস্বরূপে সর্ব্বেশে সর্ব্বশক্তি-সমন্বিতে। ভয়েভ্যস্ত্রাহি নো দেবি দুর্গে দেবি নমোহস্তু তে।। ২৪	সর্ব-স্বরূপে সর্ব-ঈশে সর্ব-শক্তি-সমন্বিতে। ভয়েভ্যঃ ত্রাহি নঃ দেবি দুর্গে দেবি নমঃ অস্তু তে।। ২৪
এতত্তে বদনং সৌম্যং লোচনত্রয়-ভূষিতম্‌। পাতু নঃ সর্ব্বভূতেভ্যঃ কাত্যায়নি নমোহস্তু তে।। ২৫	এতৎ তে বদনং সৌম্যং লোচনত্রয়-ভূষিতম্‌। পাতু নঃ সর্ব-ভূতেভ্যঃ কাত্যায়নি নমঃ অস্তু তে।। ২৫
জ্বালাকরালমত্যু-গ্রমশেষাসুরসূদনম্‌। ত্রিশূলং পাতু নো ভীতের্ভদ্রকালি নমোহস্তু তে।। ২৬	জ্বালা-করালম্‌ অতি-উগ্রম্‌ অশেষ-অসুর-সূদনম্‌। ত্রিশূলং পাতু নঃ ভীতেঃ ভদ্রকালি নমঃ অস্তু তে।। ২৬
হিনস্তি দৈত্যতেজাংসি স্বনেনাপূর্য্য যা জগৎ। সা ঘন্টা পাতু নো দেবি পাপেভ্যোহনঃ সুতানিব।। ২৭	হিনস্তি দৈত্য-তেজাংসি স্বনেন আপূর্য্য যা জগৎ। সা ঘন্টা পাতু নঃ দেবি পাপেভ্যঃ অনঃ সুতান্‌ ইব।। ২৭
অসুরাসৃগ্‌ বসাপঙ্কচর্চ্চিতস্তে করোজ্জ্বলঃ। শুভায় খড়্গো ভবতু চণ্ডিকে ত্বাং নতা বয়ম্‌।। ২৮	অসুর-অসৃক্‌-বসা-পঙ্ক-চর্চ্চিতঃ তে কর-উজ্জ্বলঃ। শুভায় খড়্গঃ ভবতু চণ্ডিকে ত্বাং নতাঃ বয়ম্‌।। ২৮
রোগানশেষানপহংসি তুষ্টাড় রুষ্টা তু কামান্‌ সকলানভীষ্টান্‌। ত্বামাশ্রিতানাং ন বিপন্নরাণাং, ত্বামাশ্রিতা হ্যাশ্রয়তাং প্রয়ান্তি।। ২৯	রোগান্‌ অশেষান্‌ অপহংসি তুষ্টাড় রুষ্টা তু কামান্‌ সকলান্‌ অভীষ্টান্‌। ত্বাম্‌ আশ্রিতানাং ন বিপৎ নরাণাং, ত্বাম্‌ আশ্রিতাঃ হি আশ্রয়তাং প্রয়ান্তি।। ২৯
এতৎ কৃতং যৎ কদনং ত্বয়াদ্য, ধর্ম্মদ্বিষাং দেবি মহাসুরাণাম্‌। রূপৈরনেকৈর্বহুধাত্ম-মূর্ত্তিং, কৃত্বাম্বিকে তৎ প্রকরোতি কান্যা।। ৩০	এতৎ কৃতম্‌ যৎ কদনং ত্বয়া অদ্য, ধর্ম-দ্বিষাং দেবি মহাসুরাণাম্‌। রূপৈঃ অনেকৈঃ বহু-ধা আত্মমূর্তিম্‌, কৃত্বা অম্বিকে তৎ প্রকরোতি কা অন্যা।। ৩০
বিদ্যাসু শাস্ত্রেষু বিবেক- দীপেষ্বাদ্যেষু বাক্যেষু চ কা ত্বদন্যা। মমত্বগর্ত্তেহতিমহান্ধকারে, বিভ্রাময়ত্যেতদতীব বিশ্বম্‌।। ৩১	বিদ্যাসু শাস্ত্রেষু বিবেক-দীপেষু আদ্যেষু বাক্যেষু চ কা ত্বৎ অন্যা। মমত্ব-গর্তে অতি-মহা-অন্ধকারে, বিভ্রাময়তি এতৎ অতীব বিশ্বম্‌।। ৩১
রক্ষাংসি যত্রোগ্রবিষাশ্চ নাগা, যত্রারয়ো দস্যুবলানি যত্র। দাবানলো যত্র তথাব্ধিমধ্যে, তত্র স্থিতা ত্বং পরিপাসি বিশ্বম্‌।। ৩২	রক্ষাংসি যত্র উগ্রবিষাঃ চ নাগাঃ, যত্র অরয়ঃ দস্যু-বলানি যত্র। দাব-অনলঃ যত্র তথা অব্‌ধি-মধ্যে, তত্র স্থিতা ত্বং পরিপাসি বিশ্বম্‌।। ৩২
বিশ্বেশ্বরী ত্বং পরিপাসি বিশ্বং, বিশ্বাত্মিকা ধারয়সীতি বিশ্বম্‌। বিশ্বেশবন্দ্যা ভবতী ভবন্তি, বিশ্বাশ্রয়া যে ত্বয়ি ভক্তিনম্রাঃ।। ৩৩	বিশ্ব-ঈশ্বরী ত্বং পরিপাসি বিশ্বং, বিশ্ব-আত্মিকা ধারয়সি ইতি বিশ্বম্‌। বিশ্ব-ঈশ-বন্দ্যা ভবতী ভবন্তি, বিশ্ব-আশ্রয়াঃ যে ত্বয়ি ভক্তি নম্রাঃ।। ৩৩
দেবি! প্রসীদ পরিপালয় নোহরিভীতেঃ, র্নিত্যং যথাসুরবধাদধুনৈব সদ্যঃ। পাপানি সর্ব্বজগতাঞ্চ শমং নয়াশু, উৎপাতপাক-জনিতাংশ্চ মহোপসর্গান্‌।। ৩৪	দেবি প্রসীদ পরিপালয় নঃ অরি-ভীতেঃ, নিত্যং যথা অসুর-বধাৎ অধুনা এব সদ্যঃ। পাপানি সর্ব-জগতাং চ শমং নয় আশু, উৎপাত-পাক-জনিতাং চ মহা-উপসর্গান্‌।। ৩৪
প্রণতানাং প্রসীদ ত্বং দেবি! বিশ্বার্ত্তিহারিণি। ত্রৈলোক্যবাসিনামীড্যে! লোকানাং বরদা ভব।। ৩৫	প্রণতানাং প্রসীদ ত্বং দেবি বিশ্ব-আর্তি-হারিণি। ত্রৈলোক্য-বাসিনাম্‌ ঈড্যে! লোকানাং বর-দা ভব।। ৩৫
দেব্যুবাচ।। ৩৬ বরদাহং সুরগণা! বরং যং মনসেচ্ছথ। তং বৃণুধ্বং প্রযচ্ছামি জগতামুপকারকম্‌।। ৩৭	দেবী উবাচ।। ৩৬ বর-দা অহং সুর-গণাঃ বরং যং মনসা ইচ্ছেথ। তং বৃণুধ্বং প্রযচ্ছামি জগতাম্‌ উপকারকম্‌।। ৩৭
দেবা ঊচুঃ।। ৩৮ সর্ব্বাবাধাপ্রশমনং ত্রৈলোক্যস্যাখিলেশ্বরি এবমেব ত্বয়া কার্য্যমস্মদ্‌বৈরিবিনাশনম্‌।। ৩৯	দেবাঃ ঊচুঃ।। ৩৮ সর্ব-আ-বাধা-প্রশমনং ত্রৈলোক্যস্য অখিল-ঈশ্বরি এবম্‌ এব ত্বয়া কার্য্যম্‌ অস্মৎ-বৈরি-বিনাশনম্‌।। ৩৯
দেব্যুবাচ।। ৪০ বৈবস্বতেহন্তরে প্রাপ্তে অষ্টাবিংশতিমে যুগে। শুম্ভো নিশুম্ভশ্চৈবান্যাবুৎপৎস্যেতে মহাসুরৌ।। ৪১	দেবী উবাচ।। ৪০ বৈবস্বতে অন্তরে প্রাপ্তে অষ্টাবিংশতিমে যুগে। শুম্ভঃ নিশুম্ভঃ চ এব অন্যৌ উৎপৎস্যেতে মহাসুরৌ।। ৪১
নন্দগোপগৃহে জাতা যশোদাগর্ভসম্ভবা। ততস্তৌ নাশয়িষ্যামি বিন্ধ্যাচলনিবাসিনী।। ৪২	নন্দ-গোপ-গৃহে জাতা যশোদা-গর্ভ-সম্ভবা। ততঃ তৌ নাশয়িষ্যামি বিন্ধ্য-অচল-নিবাসিনী।। ৪২
পুনরপ্যতিরৌদ্রেণ রূপেণ পৃথিবীতলে। অবতীর্য্য হনিষ্যামি বৈপ্রচিত্তাংস্তু দানবান্‌।। ৪৩	পুনঃ অপি অতিরৌদ্রেণ রূপেণ পৃথিবী-তলে। অবতীর্য হনিষ্যামি বৈপ্র-চিত্তান্‌ তু দানবান্‌।। ৪৩
ভক্ষয়ন্ত্যাশ্চ তানুগ্রান্‌ বৈপ্রচিত্তান্‌ মহাসুরান্‌। রক্তা দন্তা ভবিষ্যন্তি দাড়িমী-কুসুমোপমাঃ।। ৪৪	ভক্ষয়ন্ত্যা চ তান্‌ উগ্রান্‌ বৈপ্র-চিত্তান্‌ মহাসুরান্‌। রক্তাঃ দন্তাঃ ভবিষ্যন্তি দাড়িমী-কুসুম-উপমাঃ।। ৪৪
ততো মাং দেবতাঃ স্বর্গে মর্ত্ত্যলোকে চ মানবাঃ। স্তুবন্তো ব্যাহরিষ্যন্তি সততং রক্তদন্তিকাম্‌।। ৪৫	ততঃ মাং দেবতাঃ স্বর্গে মর্ত্যলোকে চ মানবাঃ। স্তুবন্তঃ ব্যাহরিষ্যন্তি সততং রক্তদন্তিকাম্‌।। ৪৫
ভূয়শ্চ শতবার্ষিক্যামনাবৃষ্ট্যা মনম্ভসি। মুনিভিঃ সংস্তুতা ভূমৌ সম্ভবি-ষ্যাম্যযোনিজা।। ৪৬	ভূয়ঃ চ শত-বার্ষিক্যাং অনাবৃষ্ট্যাম্‌ অনম্ভসি। মুনিভিঃ সংস্তুতা ভূমৌ সম্ভবিষ্যামি অ-যোনি-জা।। ৪৬
ততঃ শতেন নেত্রাণাং নিরীক্ষিষ্যামি যন্মুনীন্‌। কীর্ত্তয়িষ্যন্তি মনুজাঃ শতাক্ষীমিতি মান্ততঃ।। ৪৭	ততঃ শতেন নেত্রাণাং নিরীক্ষিষ্যামি যৎ মুনীন্‌। কীর্তয়িষ্যন্তি মনু-জাঃ শত-অক্ষীম্‌ ইতি মাং ততঃ।। ৪৭
ততোহহমখিলং লোকমাত্মদেহ-সমুদ্ভবৈঃ। ভরিষ্যামি সুরাঃ! শাকৈরাবৃষ্টেঃ প্রাণধারকৈঃ।। ৪৮	ততঃ অহম্‌ অখিলং লোকম্‌ আত্ম-দেহ-সমুদ্ভবৈঃ। ভরিষ্যামি সুরাঃ শাকৈঃ আবৃষ্টেঃ প্রাণধারকৈঃ।। ৪৮
শাকম্ভরীতি বিখ্যাতিং তদা যাস্যাম্যহং ভুবি। তত্রৈব চ বধিষ্যামি দুর্গমাখ্যং মহাসুর্‌ম।। ৪৯	শাকম্ভরী ইতি বিখ্যাতিং তদা যাস্যাম্যি-অহং ভুবি। তত্র এব চ বধিষ্যামি দুর্গম-আখ্যং মহাসুর্‌ম।। ৪৯
দুর্গাদেবীতি বিখ্যাতং তন্মে নাম ভবিষ্যতি। পুনশ্চাহং যদা ভীমং রূপং কৃত্বা হিমাচলে।। ৫০	দুর্গা দেবী ইতি বিখ্যাতং তৎ মে নাম ভবিষ্যতি। পুনশ্চ অহং যদা ভীমং রূপং কৃত্বা হিম-অচলে।। ৫০
রক্ষাংসি ক্ষয়য়িষ্যামি মুনীর্না ত্রাণকারণাৎ। তদা মাং মুনয়ঃ সর্ব্বে স্তোষ্যন্ত্যানম্রমূর্ত্তয়ঃ।। ৫১	রক্ষাংসি ক্ষয়য়িষ্যামি মুনীনাং ত্রাণ-কারণাৎ। তদা মাং মুনয়ঃ সর্বে স্তোষ্যন্তি আনম্র-মূর্তয়ঃ।। ৫১
ভীমাদেবীতি বিখ্যাতং তন্মে নাম ভবিষ্যতি। যদারুণাখ্যস্ত্রৈলোক্যে মহাবাধাং করিষ্যতি।। ৫২	ভীমাদেবী ইতি বিখ্যাতং তৎ মে নাম ভবিষ্যতি। যদা অরুণ-আখ্যঃ ত্রৈলোক্যে মহাবাধাং করিষ্যতি।। ৫২
তদাহং ভ্রামরং রূপং কৃত্বাহসংখ্যেয়ষট্‌ পদম্‌। ত্রৈলোক্যস্য হিতার্থায় বধিষ্যামি মহাসুরম্‌।। ৫৩	তদা অহম্‌ ভ্রামরং রূপং কৃত্বা অসংখ্যেয়-ষট্‌ পদম্‌। ত্রৈলোক্যস্য হিত-অর্থায় বধিষ্যামি মহাসুরম্‌।। ৫৩
ভ্রামরীতি চ মাং লোকাস্তদা স্তোষ্যন্তি সর্ব্বতঃ। ইত্থং যদা যদা বাধা দানবোত্থা ভবিষ্যতি।। ৫৪	ভ্রামরী ইতি চ মাং লোকাঃ তদা স্তোষ্যন্তি সর্বতঃ। ইত্থং যদা যদা বাধা দানব-উত্থা ভবিষ্যতি।। ৫৪
তদা তদাবতীর্য্যাহং করিষ্যাম্যরিসংক্ষয়ম্‌।। ৫৫	তদা তদা অবতীর্য অহম্‌ করিষ্যামি অরি-সংক্ষয়ম্‌।। ৫৫
ইতি মার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে দেব্যা স্তুতিঃ।। ১১শ অঃ।।