নবমঃ অধ্যায়ঃ
ওঁ নমশ্চণ্ডিকায়ৈ।
নিশুম্ভ বধ

মূল

পাঠ সংকেত

রাজোবাচ।। ১
বিচিত্রমিদমাখ্যাতং ভগবন্‌! ভবতা মম।
দেব্যাশ্চরিতমাহাত্ম্যং রক্তবীজবধাশ্রিতম্‌।। ২

রাজা উবাচ।। ১
বিচিত্রম্‌ ইদম্‌ আখ্যাতং ভগবন্‌ ভবতা মম।
দেব্যাঃ চরিত-মাহাত্ম্যং রক্তবীজ-বধ-আশ্রিতম্‌।। ২

ভূয়শ্চেচ্ছাম্যহং শ্রোতুং রক্তবীজে নিপাতিতে।
চকার শুম্ভো যৎ কর্ম্ম নিশুম্ভশ্চাতিকোপানঃ।। ৩

ভূয়ঃ চ ইচ্ছামি অহং শ্রোতুং রক্তবীজে নিপাতিতে।
চকার শুম্ভঃ যৎ কর্ম নিশুম্ভঃ চ অতি-কোপানঃ।। ৩

ঋষিরুবাচ।। ৪
চকার কোপমতুলং রক্তবীজে নিপাতিতে।
শুম্ভাসুরো নিশুম্ভশ্চ হতেষ্বন্যেষু চাহবে।। ৫

ঋষিঃ উবাচ।। ৪
চকার কোপম্‌ অতুলং রক্তবীজে নিপাতিতে।
শুম্ভাসুরঃ নিশুম্ভঃ চ হতেষু-অন্যেষু চ আহবে।। ৫

হন্যমানং মহাসৈন্যং বিলোক্যামর্যমুদ্‌বহন্‌।
অভ্যধাবন্নিশুম্ভোহথ মুখ্যয়াসুরসেনয়া।। ৬

হন্যমানং মহাসৈন্যং বিলোক্য অমর্যম্‌ উদ্‌বহন্‌।
অভ্যধাবৎ নিশুম্ভঃ অথ মুখ্যয়া অসুর-সেনয়া।। ৬

তস্যাগ্রতস্তথা পৃষ্ঠে পার্শ্বয়োশ্চ মহাসুরাঃ।
সন্দষ্টোষ্ঠপুটাঃ ক্রুদ্ধা হন্তুং দেবীমুপাযযুঃ।। ৭

তস্য অগ্রতঃ তথা পৃষ্ঠে পার্শ্বয়োঃ চ মহাসুরাঃ।
সন্দষ্ট-ওষ্ঠ-পুটাঃ ক্রুদ্ধাঃ হন্তুম্‌ দেবীম্‌ উপাযযুঃ।। ৭

আজগাম মহাবীর্য্যঃ শুম্ভোহপি স্ববলৈর্বৃতঃ।
নিহন্তুং চণ্ডিকাং কোপাৎ কৃত্বা যুদ্ধন্তু মাতৃভিঃ।। ৮

আজগাম মহাবীর্যঃ শুম্ভঃ অপি স্ব-বলৈঃ বৃতঃ।
নিহন্তুম্‌ চণ্ডিকাং কোপাৎ কৃত্বা যুদ্ধং তু মাতৃভিঃ।। ৮

ততো যুদ্ধমতীবাসীৎ দেব্যা শুম্ভ-নিশুম্ভয়োঃ।
শরবর্ষমতীবোগ্রং মেঘয়োরিব বর্ষতোঃ।।৯

ততঃ যুদ্ধম্‌ অতীব আসীৎ দেব্যা শুম্ভ-নিশুম্ভয়োঃ।
শর-বর্ষম্‌ অতীব উগ্রং মেঘয়েঃ ইব বর্ষতোঃ।।৯

চিচ্ছেদাস্তাঞ্ছরাংস্তাভ্যাং চণ্ডিকাশু শরোৎকারৈঃ।
তাড়য়ামাস চাঙ্গেষু শস্ত্রৌঘৈরসুরেশ্বরৌ।। ১০

চিচ্ছেদ অস্তান্‌ চ শরান্‌ তাভ্যাম্‌ চণ্ডিকা শু-শর-উৎকারৈঃ।
তাড়য়ামাস চ অঙ্গেষু শস্ত্র-ওঘৈঃ অসুর-ঈশ্বরৌ।। ১০

নিশুম্ভো নিশিতং খড়্‌গং চর্ম্ম চাদায় সুপ্রভম্‌।
অতাড়য়ন্মূদ্ধ্র্ণি সিংহং দেব্যা বাহনমুত্তমম্।। ১১

নিশুম্ভঃ নিশিতং খড়্‌গং চর্ম চ আদায় সুপ্রভম্‌।
অতাড়য়ৎ মূদ্ধ্র্ণি সিংহং দেব্যাঃ বাহনম্ উত্তমম্।। ১১

তাড়িতে বাহনে দেবী খুরপ্রেণাসিমুত্তমম্‌।
নিশুম্ভস্যাশু চিচ্ছেদ চর্ম্ম চাপ্যষ্টচন্দ্রকম্‌।। ১২

তাড়িতে বাহনে দেবী খুরপ্রেণ অসিম্‌ উত্তমম্‌।
নিশুম্ভস্য আশু চিচ্ছেদ চর্ম চ অপি অষ্ট-চন্দ্রকম্‌।। ১২

ছিন্নে চর্ম্মণি খড়্গে চ শক্তিং চিক্ষেপ সোহসুরঃ।
তামপ্যস্য দ্বিধা চক্রে চক্রেণাভি-মুখাগতাম্‌।। ১৩

ছিন্নে চর্মণি খড়্গে চ শক্তিং চিক্ষেপ সঃ অসুরঃ।
তাম্‌ অপি অস্য দ্বিধা চক্রে চক্রেণ অভিমুখ আগতাম্‌।। ১৩

কোপাধ্মাতো নিশুম্ভোহথ শূলং জগ্রাহ দানবঃ।
আয়ান্তং মুষ্টিপাতেন দেবী তচ্চাপ্যচূর্ণয়ৎ।। ১৪

কোপ-আধ্‌মাতঃ নিশুম্ভঃ অথ শূলং জগ্রাহ দানবঃ।
আয়ান্তং মুষ্টি-পাতেন দেবী তৎ চ অপি অচূর্ণয়ৎ।। ১৪

আবিধ্যাথ গদাং সোহপি চিক্ষেপ চণ্ডিকাং প্রতি।
সাপি দেব্যা ত্রিশূলেন ভিন্না ভস্মত্বমাগতা।। ১৫

আবিধ্য অথ গদাং সঃ অপি চিক্ষেপ চণ্ডিকাং প্রতি।
সা অপি দেব্যা ত্রিশূলেন ভিন্না ভস্মত্বম্‌ আগতা।। ১৫

ততঃ পরশুহস্তং তমায়ান্তং দৈত্যপুঙ্গবম্‌।
আহত্য দেবী বাণৌঘৈরপাতয়ত ভূতলে।। ১৬

ততঃ পরশু-হস্তং তম্‌ আয়ান্তং দৈত্যপুঙ্গবম্‌।
আহত্য দেবী বাণ-ওঘৈঃ অপাতয়ত ভূ-তলে।। ১৬

তস্মিন্নিপতিতে ভূমৌ নিশুম্ভে ভীমবিক্রমে।
ভ্রাতর্য্যতীব সংক্রুদ্ধঃ প্রযযৌ হন্তুমম্বিকাম্।। ১৭

তস্মিন্‌ নিপতিতে ভূমৌ নিশুম্ভে ভীম-বিক্রমে।
ভ্রাতরি অতীব সংক্রুদ্ধঃ প্রযযৌ হন্তুম্ অম্বিকাম্।। ১৭

স রথস্থস্তথাত্যুচ্চৈর্গৃহীত পরামায়ুধৈঃ।
ভুজৈরষ্টাভিরতুলৈর্ব্যাপ্যাশেষং বভৌ নভঃ।। ১৮

সঃ রথস্থঃ তথা অতি উচ্চৈঃ গৃহীত পরাম-আয়ুধৈঃ।
ভুজৈঃ অষ্টাভিঃ অতুলৈঃ ব্যাপ্য অশেষং বভৌ নভঃ।। ১৮

তমায়ান্তং সমালোক্য দেবী শঙ্খমবাদয়ৎ।
জ্যাশব্দঞ্চাপি ধনুষশ্চকারাতীব দুঃসহম্‌।। ১৯

তম্‌ আয়ান্তং সমালোক্য দেবী শঙ্খম্‌ অবাদয়ৎ।
জ্যা-শব্দম্‌ চ অপি ধনুষঃ চকার অতীব দুঃসহম্‌।। ১৯

পূরয়ামাস ককুভো নিজঘন্টাস্বনেন চ।
সমস্ত-দৈত্য-সৈন্যানাং তেজোবধ-বিধায়িনা। ২০

পূরয়ামাস ককুভঃ নিজ-ঘন্টা-স্বনেন চ।
সমস্ত-দৈত্য-সৈন্যানাং তেজঃ-বধ-বিধায়িনা। ২০

ততঃ সিংহো মহানাদৈস্ত্যাজিতেভমহামদৈঃ।
পূরয়ামাস গগনং গাং তথোপদিশো দশ।। ২১

ততঃ সিংহঃ মহানাদৈঃ ত্যাজিত-ইভ-মহা-মদৈঃ।
পূরয়ামাস গগনং গাং তথা উপদিশঃ দশ।। ২১

ততঃ কালী সমুৎপত্য গগনং ক্ষ্মামতাড়য়ৎ।
করাভ্যাং তন্নিনাদেন প্রাক্স্বনাস্তে তিরোহিতাঃ।। ২২

ততঃ কালী সমুৎপত্য গগনং ক্ষ্মাম্‌ অতাড়য়ৎ।
করাভ্যাং তৎ নিনাদেন প্রাক্-স্বনাঃ তে তিরোহিতাঃ।। ২২

অট্টাট্টহাসমশিবং শিবদূতী চকার হ।ড়
তৈঃ শব্দৈরসুরাস্ত্রেসুঃ শুম্ভঃ কোপং পরং যযৌ।। ২৩

অট্ট অট্টহাসম্‌ অশিবং শিবদূতী চকার হ।ড়
তৈঃ শব্দৈঃ অসুরঃ ত্রেসুঃ শুম্ভঃ কোপং পরং যযৌ।। ২৩

দুরাত্মংস্তিষ্ঠ তিষ্ঠেতি ব্যাজহারাম্বিকা যদা।
তদা জয়েত্যভিহিতং দেবৈরাকাশসংস্থিতৈঃ।। ২৪

দুরাত্মন্ তিষ্ঠ তিষ্ঠ ইতি ব্যাজহার অম্বিকা যদা।
তদা জয়া ইতি অভিহিতং দেবৈঃ আকাশ-সংস্থিতৈঃ।। ২৪

শুম্ভেনাগত্যা যা শক্তির্মুক্তা জ্বালাতিভীষণা।
আয়ান্তী বহ্নিকূটাভা সা নিরস্তা মহোল্কয়া।। ২৫

শুম্ভেন আগত্যা যা শক্তিঃ মুক্তা জ্বালা-অতি-ভীষণা।
আয়ান্তী বহ্নি-কূট-আভা সা নিরস্তা মহোল্কয়া।। ২৫

সিংহনাদেন শুম্ভস্য ব্যাপ্তং লোকত্রয়ান্তরম্‌।
নির্ঘাতনিঃস্বনো ঘোরো জিতবানবনীপতে।। ২৬

সিংহ-নাদেন শুম্ভস্য ব্যাপ্তং লোক-ত্রয়-অন্তরম্‌।
নির্ঘাত-নিঃস্বনঃ ঘোরঃ জিতবান্ অবনী-পতে।। ২৬

শুম্ভমুক্তাঞ্ছরান্‌ দেবী শুম্ভস্তৎ প্রহিতাঞ্ছরান্‌।
চিচ্ছেদ স্বশরৈরুগ্রৈঃ শতশোহথ সহস্রশঃ।। ২৭

শুম্ভ-মুক্তান্‌ শরান্‌ দেবী শুম্ভ তৎ প্রহিতান্‌ শরান্‌।
চিচ্ছেদ স্ব-শরৈঃ উগ্রৈঃ শত-শঃ অথ সহস্র-শঃ।। ২৭

ততঃ সা চণ্ডিকা ক্রুদ্ধা শূলেনাভিজঘান তম্‌।
স তদাভিহতো ভূমৌ মূর্চ্ছিতো নিপপাত হ।। ২৮

ততঃ সা চণ্ডিকা ক্রুদ্ধা শূলেন অভিজঘান তম্‌।
স তদাভিহতো ভূমৌ মূর্চ্ছিতো নিপপাত হ।। ২৮

ততো নিশুম্ভঃ সমপ্রাপ্য চেতনামাত্তকার্ম্মুকঃ।
আজঘান শরৈর্দেবীং কালীং কেশরিণং তথা।। ২৯

ততঃ নিশুম্ভঃ সংপ্রাপ্য চেতনাম্‌ আত্ত-কার্মুকঃ।
আজঘান শরৈঃ দেবীং কালীং কেশরিণং তথা।। ২৯

পুনশ্চ কৃত্বা বাহূনামযুতং দনুজেশ্বরঃ।
চক্রায়ুধেন দিতিজশ্ছাদয়ামাস চণ্ডিকাম্‌।। ৩০

পুনঃ চ কৃত্বা বাহূনাম্‌ অযুতম্‌ দনু-জ-ঈশ্বরঃ।
চক্র আয়ুধেন দিতি-জঃ ছাদয়ামাস চণ্ডিকাম্‌।। ৩০

ততো ভগবতী ক্রুদ্ধা দুর্গা দুর্গার্ত্তিনাশিনী।
চিচ্ছেদ তানি চক্রাণি স্বশরৈঃ সায়কাংশ্চ তান্।। ৩১

ততঃ ভগবতী ক্রুদ্ধা দুর্গা দুর্গ-আর্তি-নাশিনী।
চিচ্ছেদ তানি চক্রাণি স্ব-শরৈঃ সায়কান্ চ তান্।। ৩১

ততো নিশুম্ভো বেগেন গদামাদায় চণ্ডিকাম্‌।
অভ্যধাবত বৈ হন্তুং দৈত্যসেনাসমাবৃতঃ।। ৩২

ততঃ নিশুম্ভঃ বেগেন গদাম্‌ আদায় চণ্ডিকাম্‌।
অভ্যধাবত বৈ হন্তুম্‌ দৈত্য-সেনা সমাবৃতঃ।। ৩২

তস্যাপতত এবাশু গদাং চিচ্ছেদ চণ্ডিকা।
খড়্গেন শিতধারেণ স চ শূলং সমাদদে।। ৩৩

তস্য আপততঃ এব আশু গদাং চিচ্ছেদ চণ্ডিকা।
খড়্গেন শিত-ধারেণ সঃ চ শূলং সমাদদে।। ৩৩

শূলহস্তং সমায়ান্তং নিশুম্ভমমরার্দ্দনম্‌।
হৃদি বিব্যাধ শূলেন বেগাবিদ্ধেন চণ্ডিকা।। ৩৪

শূল-হস্তং সমায়ান্তং নিশুম্ভম্‌ অমর-অর্দনম্‌।
হৃদি বিব্যাধ শূলেন বেগ-আবিদ্ধেন চণ্ডিকা।। ৩৪

ভিন্নস্য তস্য শূলেন হৃদয়ান্নিঃসৃতোহপরঃ।
মহাবলো মহাবীর্য্যস্তিষ্ঠেতি পুরুষো বদন্‌।। ৩৫

ভিন্নস্য তস্য শূলেন হৃদয়াৎ নিঃসৃতঃ অপরঃ।
মহাবলঃ মহাবীর্যঃ তিষ্ঠ ইতি পুরুষঃ বদন্‌।। ৩৫

তস্য নিষ্ক্রামতো দেবী প্রহস্য স্বনবৎ ততঃ।
শিরশ্চিচ্ছেদ খড়্গেন ততোহসাবপতদ্ ভুবি।। ৩৬

তস্য নিষ্ক্রামতঃ দেবী প্রহস্য স্বন-বৎ ততঃ।
শিরঃ চিচ্ছেদ খড়্গেন ততঃ অসৌ অপতৎ ভুবি।। ৩৬

ততঃ সিংহশ্চখাদোগ্রদংষ্ট্রাক্ষুণ্ন-শিরোধরান্‌।
অসুরাংস্তাংস্তথা কালী শিবদূতী তথাপরান্‌।। ৩৭

ততঃ সিংহঃ চখাদ উগ্র-দংষ্ট্রা-ক্ষুণ্ন-শিরঃ ধরান্‌।
অসুরান্‌ তান তথা কালী শিবদূতী তথা অপরান্‌।। ৩৭

কৌমারী-শক্তি-নির্ভিন্নাঃ কেচিন্নেশুর্ম্মহাসুরাঃ।
ব্রহ্মাণী-মন্ত্রপূতেন তোয়েনান্যে নিরাকৃতাঃ।। ৩৮

কৌমারী-শক্তি-নির্ভিন্নাঃ কে-চিৎ নেশুঃ মহাসুরাঃ।
ব্রহ্মাণী-মন্ত্র-পূতেন তোয়েন অন্যে নিরাকৃতাঃ।। ৩৮

মাহেশ্বরী-ত্রিশূলেন ভিন্নাঃ পেতুস্তথাপরে।
বারাহী-তুণ্ডঘাতেন কেচিচ্চূর্ণীকৃতা ভুবি।। ৩৯

মাহেশ্বরী-ত্রিশূলেন ভিন্নাঃ পেতুঃ তথা অপরে।
বারাহী-তুণ্ড-ঘাতেন কে-চিৎ চূর্ণীকৃতাঃ ভুবি।। ৩৯

খণ্ডখণ্ডঞ্চ চক্রেণ বৈষ্ণব্যা দানবাঃ কৃতাঃ।
বজ্রেণ চৈন্দ্রীহস্তাগ্র-বিমুক্তেন তথাপরে।। ৪০

খণ্ডং খণ্ডং চ চক্রেণ বৈষ্ণব্যা দানবাঃ কৃতাঃ।
বজ্রেণ চ ঐন্দ্রী-হস্ত-অগ্র-বিমুক্তেন তথা অপরে।। ৪০

কেচিদ্‌ বিনেশুরসুরাঃ কেচিন্নষ্টা মহাহবাৎ।
ভক্ষিতাশ্চাপরে কালী শিবদূতী-মৃগাধিপৈঃ।। ৪১

কে-চিৎ বিনেশুঃ অসুরাঃ কে-চিৎ নষ্টাঃ মহা-আহবাৎ।
ভক্ষিতাঃ চ অপরে কালী শিবদূতী-মৃগ-অধিপৈঃ।। ৪১

ইতি মার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে নিশুম্ভবধঃ।। ৯ম অঃ।।