অথ সপ্তশতীরহস্যত্রয়ম্
ওঁ অস্য শ্রীসপ্তশতীরহস্যত্রয়স্য ব্রহ্ম-বিষ্ণু-রুদ্রা ঋষয়ঃ
মহাকালী-মহালক্ষ্মী-মহাসরস্বত্যো দেবতাঃ, অনুষ্টুপ্ ছন্দঃ, নবদুর্গা |
প্রাধানিক-রহস্যম্
রাজোবাচ
ভগবন্নবতারা মে চণ্ডিকায়া স্ত্বয়োদিতাঃ।
এতেষাং প্রকৃতিং ব্রহ্মন্ প্রধানং বক্তুমর্হসি।। ১
আরাধ্যং যন্ময়া দেব্যাঃ স্বরূপং যেন বৈ দ্বিজ।
বিধিনা ব্রূহি সকলং যথাবৎ প্রণতস্য মে।। ২
ঋষিরুবাচ
ইদং রহস্যং পরমমনাখ্যেয়ং প্রচক্ষ্যতে।
ভক্তোহসীতি ন মে কিঞ্চিৎ তবাবাচ্যং নরাধিপ।। ৩
সর্বস্যাদ্যা মহালক্ষ্মী স্ত্রিগুণা পরমেশ্বরী।
লক্ষ্যালক্ষ্যস্বরূপা সা ব্যাপ্য কৃৎস্নং ব্যবস্থিতা।। ৪
মাতুলিঙ্গং* গদাং খেটং পানপাত্রঞ্চ বিভ্রতী।
নাগং লিঙ্গঞ্চ যোনিঞ্চ বিভ্রতী নৃপ মূর্ধ্বনি।। ৫
তপ্তকাঞ্চনবর্ণাভা তপ্তকাঞ্চনভূষণা।
শূন্যং তদখিলং স্মেন পূরয়ামাস তেজসা।। ৬
শূন্যং তদখিলং লোকং বিলোক্য পরমেশ্বরী।
বভার রূপমপরং তমসা কেবলন হি।। ৭
সা ভিন্নাঞ্জনসঙ্কাশা দংষ্ট্রাঞ্চিতবরাননা।
বিশাললোচনা নারী বভূব তনুমধ্যমা।। ৮
খড়্গ-পাত্র-শিরঃ-খেটৈরলঙ্কৃত-চতুর্ভুজা।
কবন্ধহারমূরসা বিভ্রাণা শিরসা স্রজম্।। ৯ড়
তাং প্রোবাচ মহালক্ষ্মীস্তামসীং প্রমদোত্তমাম্।
দদামি তব নামানি যানি কর্মাণি তানি তে।। ১০
মহামায়া মহাকালী মহামারী ক্ষুধা তৃষা।
নিদ্রা তৃষ্ণা চৈকবীরা কালরাত্রির্দুরত্যয়া।। ১১
ইমানি তব নামানি প্রতিপাদ্যানি কর্মভিঃ।
এভিঃ কর্মাণি তে জ্ঞাত্বা যোহধীতে সোহশ্নুতে সুখম্।। ১২
তামিত্যুক্ত্বা মহালক্ষ্মীঃ স্বরূপমপরং নৃপ।
সত্ত্বাখ্যেনাভিশুদ্ধেন গুণেনেন্দুপ্রভং দধৌ।। ১৩
অক্ষমালাঙ্কুশধরা বীণাপুস্তকধারিণী।
সা বভুব বরা নারী নামান্যস্যৈব সা দদৌ।। ১৪
মহাবিদ্যা সহাবাণী ভারতী বাক্ সরস্বতী|
আর্য্যা ব্রাহ্মী ওকামধেনুর্বেদগর্ভা চ ধীশ্বরী*।। ১৫
অথোবাচ মহালক্ষ্মীর্মহাকালীং সরস্বতীম্।
যুবাং জনয়তাং দের্বৌ মিথুনে স্বানুরূপতঃ।। ১৬
ইত্যুক্ত্বা তে মহালক্ষ্মীঃ সসর্জ মিথুনং স্বয়ম্।
হিরণ্যগর্ভৌ রুচিরৌ স্ত্রীপুংসৌ কমলাসনৌ।। ১৭
ব্রহ্মন্ বিধে বিরঞ্চেতি ধাতরিত্যাহ তং নবম্।
শ্রীঃ পদ্মে কমলে লক্ষীত্যাহ মাতা স্ত্রিয়ঞ্চ তাম্। ১৮
মহাকালী ভারতী চ মিথুনে সৃজতঃ সহ।
এতয়োরপি রূপাণি নামানি চ বদামি তে।। ১৯
নীলকণ্ঠং রক্তবাহুং শ্বেতাঙ্গং চন্দ্রশেখরম্।
জনয়ামাস পুরুষং মহাকালী সিতাং স্ত্রীয়ম্।। ২০
স রুদ্রঃ শঙ্করঃ স্থাণুঃ কপর্দী চ ত্রিলোচনঃ।
ত্রয়ী বিদ্যা কামধেনুঃ সা স্ত্রীভাবা* স্বরাহক্ষরা।। ২১
সরস্বতী স্ত্রিয়ং গৌরীং কৃষ্ণষ্ণ পুরুষং নৃপ।
জনয়ামাস নামানি তয়োরপি বদামি তে।। ২২
বিষ্ণুঃ কৃষ্ণো হৃষীকেশো বাসুদেবো জনার্দনঃ।
উমা গৌরী সতী চণ্ডী সুন্দরী সুভগা শিবা**।। ২৩
এবং যুবতয়ঃ সদ্যঃ পুরুষত্বং প্রপেদিরে।
চক্ষুষ্মন্তো নু পশ্যন্তি নেতরেহতদবিদোজনাঃ।। ২৪
ব্রহ্মণে প্রদদৌ পত্নীং মহালক্ষ্মীর্নৃপ ত্রয়ীম্।
রুদ্রায় গৌরীং বরদাং বাসুদেবায় চ শ্রিয়ম্।। ২৫
স্বরয়া সহ সম্ভূয় বিরঞ্চোহগুমজীজনৎ।
বিভেদ ভগবান্ রুদ্রস্তদ্ গৌর্যা সহ বীর্যবান্।। ২৬
অণ্ডমধ্যে প্রধানাদি-কার্যজাতমভূন্নৃপ।
মহাভূতাত্মকং সর্ব্বং জগৎ স্থাবরজঙ্গমম্।। ২৭
পুপোষ পালয়ামাস তলক্ষ্ম্যা সহ কেশবঃ।
সংজহার জগৎ সর্ব্বং সহ গৌর্যা মহেশ্বরঃ।। ২৮
মহালক্ষ্মীর্মহারাজ সর্ব্বসত্ত্বময়ীশ্বরী।
নিরাকারা চ সাকারা সৈব নানাভিধানভৃৎ।।
নামান্তরৈর্নিরূপ্যৈষা নাম্না নান্যেন কেনচিৎ।। ২৯
ইতি শ্রীমার্কণ্ডেয় পুরাণে প্রাধানিক-রহস্যং সমাপ্তম্।
*সুরেশ্বরী ইতি বা পাঠঃ।
*মাতুলুঙ্গম্ ইতি বা পাঠঃ।
*স্ত্রীভাষা ইতি বা পাঠঃ।
**শুভা ইতি বা পাঠঃ। |
বৈকৃতিক রহস্যম্
ঋষিরুবাচ
ত্রিগুণা তামসী দেবী সাত্ত্বিকী যা ত্রিধোদিতা*।
সা শর্বা চণ্ডিকা দুর্গা ভদ্রা ভগবতীর্যতে।। ১
যোগনিদ্রা হরেরুক্তা মহাকালী তমোগুণা।
মধুকৈটভনাশার্থং যাং তুষ্টাবাম্বুজাসনঃ।। ২
দশবক্ত্রা দশভুজা দশপাদাঞ্জনপ্রভা।
বিশালয়া রাজমানা ত্রিংশল্লোচনমালয়া।। ৩
স্ফুরদ্দশনদংষ্ট্রা সা ভীমরূপাপি ভূমিপ।
রূপসৌভাগ্যকান্তীনাং সা প্রতিষ্ঠা মহাশ্রিয়াম্।। ৪
খড়্গ-বাণ-গদা-শূল-শঙ্খ-চক্র-ভুশুণ্ডিভৃৎ।
পরিঘং কার্মুকং শীর্ষং নিশ্চ্যোতদ্রুধিরং দধৌ।। ৫
এষা সা বৈষ্ণবী মায়া মহাকালী দুরত্যয়া।
আরাধিতা বশীকুর্যাৎ পূজাকর্ত্তূশ্চরাচরম।। ৬
সর্ব্বদেবশরীরেভ্যো যাবির্ভূতামিতপ্রভা।
ত্রিগুণা সা মহালক্ষ্মীঃ সাক্ষান্মহিষমর্দিনী।। ৭
শ্বেতাননা নীলভুজা সুশ্বেতস্তনমণ্ডলা।
রক্তমধ্যা রক্তপাদা নীলজঙ্ঘোরুরুন্মদা।। ৮
সূচীত্রজঘনা চিত্রমাল্যাম্বরবিভূষণা।
চিত্রানুলেপনা কান্তি-রূপ-সৌভাগ্যশালিনী।। ৯
অষ্টাদশভুজা পূজ্যা সা সহস্রভুজা সতী।
আয়ুধান্যত্র বক্ষন্তে দক্ষিণাধঃকরক্রমাৎ।। ১০
অক্ষমালা চ কমলং বাণোহসিঃ কুলিশং গদা।
চক্রং ত্রিশূলং পরশুঃ শঙ্খো ঘন্টা চ পাশকঃ।
শক্তির্দণ্ডশ্চর্ম চাপং পানপাত্রং কমণ্ডলুঃ।। ১১
অলঙ্কৃতভুজামেভিরায়ুধৈঃ কমলাসনাম্।
সর্ব্বদেবময়ীমীশাং মহালক্ষ্মীমিমাং নৃপ।
পূজয়েৎ সর্ব্বলোকানাং স দেবানাং প্রভুর্ভবেৎ।। ১২
গৌরীদেহাৎ সমুদ্ভূতা যা সত্ত্বৈকগুণাশ্রয়া।
সাক্ষাৎ সরস্বতী প্রোক্তা শুম্ভাসুর-নিবর্হিণী।। ১৩
দধৌ চাষ্টভুজা বাণমুসলে শূলচক্রভৃৎ।
শঙ্খং ঘন্টাং লাঙ্গলঞ্জ কার্মূকং বসুধাধিপ।। ১৪
এষা সম্পূজিতা ভক্ত্যা সর্ব্বজ্ঞত্বং প্রযচ্ছতি।
নিশুম্ভমথিনী দেবী শুম্ভাসুরনিবর্হিণী।। ১৫
ইত্যুক্তানি স্বরূপাণি মূর্তীনাং তব পার্থিব।
উপাসনং জগন্মাতুঃ পৃথগাসাং নিশাময়।। ১৬
মহালক্ষ্মীর্যদা পূজ্যা মহাকালী সরস্বতী|
দক্ষিণোত্তরয়োঃ পূজ্যে পৃষ্ঠতো মিথুনত্রয়ম্।। ১৭
বিরিঞ্চিঃ স্বরয়া মধ্যে রুদ্রো গৌর্যা চ দক্ষিণে।
বামে লক্ষ্ম্যা হৃষীকেশঃ পূরতো দেবতাত্রয়ম্।। ১৮
অষ্টাদশভুজা মধ্যে বামে চাস্যা দশাননা।
দক্ষিণেহষ্টভুজা লক্ষ্মীর্মহতীতি সমর্চয়েৎ।। ১৯
অষ্টাদশভুজা চৈষা যদা পূজ্যা নরাধিপ।
দশাননা চাষ্টভুজা দক্ষিণোত্তরয়োস্তদা।
কালমৃত্যু চ সংপূজ্যৌ সর্ব্বরিষ্টপ্রশান্তয়ে।। ২০
যদা চাষ্টভুজা পূজ্যা শুম্ভাসুরনিবর্হিণী।
নবাস্যাঃ শক্তয়ঃ পূজ্যাস্তথা রুদ্রবিনায়কৌ।। ২১
নমো দেব্যা ইতি স্তোত্রৈর্মহালক্ষ্মীং সমর্চয়েৎ।
অবতারত্রয়ার্চায়াং স্তোত্রমন্ত্রাস্তদাশ্রয়াঃ।। ২২
অষ্টাদশভুজা চৈষা পূজ্যা মহষিমর্দিনী।
মহালক্ষ্মীর্মহাকালী সৈব প্রোক্তা সরস্বতী|
ঈশ্বরী পূণ্যপাপানাং সর্ব্বলোকমহেশ্বরী।। ২৩
মহিষান্তকরী যেন পূজিতা স জগৎপ্রভুঃ।
পূজয়েজ্জগতাং ধাত্রীং চণ্ডিকাং ভক্তবৎসলাম্।। ২৪
অর্ঘ্যাদিভিরলঙ্কারৈর্গন্ধপুষ্পৈস্তথাক্ষতৈঃ।
ধূপৈর্দীপৈশ্চ নৈবেদ্যৈ-র্নানাভক্ষ্য-সমন্বিতৈঃ|| ২৫
রুধিরাক্তেন বলিনা মাংসেন সুরয়া নৃপ।
প্রণামাচমনীয়েন চন্দনেন সুগন্ধিনা।
সকর্পূরৈশ্চ তাম্বুলৈর্ভক্তিভাব-সমন্বিতৈঃ|| ২৬
বামভাগেহগ্রতো দেব্যাশ্ছিন্নশীর্ষং মহাসুরম্।
পূজয়েন্মহিষং যেন প্রাপ্তং সযুজ্যমীশয়া।। ২৭
দক্ষিণে পুরতঃ সিংহং সমগ্রং ধর্মমীশ্বরম্।
বাহনং পূজয়েদ্দেব্যা ধৃতং যেন চরাচরম্।। ২৮
ততঃ কৃতাঞ্জলির্ভূত্বা স্তুবীত চরিতৈরিমৈঃ
একেন বা মধ্যমেন নৈকেনেতররোরিহ।। ২৯
চরিতার্ধন্তু ন জপেজ্জপংশ্ছিদ্রমবাপ্নুয়াৎ।
স্তোত্রমন্ত্রৈঃ স্তুবীতেমাং যদি বা জগদম্বিকাম্|| ৩০
প্রদক্ষিণা-নমস্কারান্ কৃত্বা মুর্ধ্নি কৃতাঞ্জলিঃ।
ক্ষমাপয়েজ্জগদ্ধাত্রীং মুহুর্মুহু রতন্দ্রিতঃ।। ৩১
প্রতিশ্লোকঞ্চ জুহুয়াৎ পায়সং তিলসর্পিষা।
জুহুয়াৎ স্তোত্রমন্ত্রৈর্বা চণ্ডিকায়ৈ শুভং হবিঃ।। ৩২
নমো নমঃ পদৈর্দেবীং পূজয়েৎ সুসমাহিতঃ।
প্রয়তঃ প্রাঞ্জলিঃ প্রহ্বঃ প্রাণানারোপ্য** চাত্মনি।
সুচিরংডাবয়েদ্দেবীং চণ্ডিকাং তন্ময়ো ভবেৎ।। ৩৩
এবং যঃ পুজয়েদ্ ভক্ত্যা প্রত্যহং পরমেশ্বরীম্।
ভুক্ত্বা ভোগান্ যথাকামং দেবীসাযুজ্যমাপ্নুয়াৎ।। ৩৪
যো ন পূজয়তে নিত্যং চণ্ডিকাং ভক্তবৎসলাম্।
ভস্মীকৃত্যাস্য পূণ্যানি নির্দেহেৎ পরমেশ্বরী।। ৩৫
তস্মাৎ পূজয় ভূপাল সর্ব্বলোকমহেশ্বরীম্।
যথোক্তেন বিধানেন চণ্ডিকাং সুখমাপ্স্যসি।। ৩৬
ইতি শ্রীমার্কণ্ডেয়পুরাণে বৈকৃতিকরহস্যং সমাপ্তম্।
*ত্বয়োদিতা ইতি বা পাঠঃ।
**প্রণম্যারোপ্য ইতি বা পাঠঃ। |
মূর্ত্তি-রহস্যম্
ঋষিরুবাচ
নন্দা ভগবতী নাম যা ভবিষ্যতি নন্দজা।
সা স্তুতা পূজিতা ধ্যাতা বশীকুর্যাজ্জগত্রয়ম্।। ১
কনকোত্তমকান্তিঃ সা সুকান্তিকনকাম্বরা।
দেবী কনকবর্ণাভা কনকোত্তমভূষণা।। ২
কমলাঙ্কুশপাশাব্জৈরলঙ্কৃত-চতুর্ভুজা।
ইন্দিরা কমলা লক্ষ্মীঃ সা শ্রী রুক্মাম্বুজাসনা|| ৩
যা রক্তদন্তিকা নাম দেবী প্রোক্তা ময়ানঘ।
তস্যাঃ স্বরূপং বক্ষ্যামি শৃণু সর্ব্বভয়াপহম্।। ৪
রক্তাম্বরা রক্তবর্ণা রক্তসর্ব্বাঙ্গভূষণা।
রক্তায়ুধা রক্তনেত্রা রক্তকেশাতিভীষণা।। ৫
রক্ততীক্ষ্ণনখা রক্তবসনা রক্তদন্তিকা।
পতিং নারীবানুরক্তা দেবী-ভক্তং ভজেজ্জনম্।। ৬
বসুধেব বিশালা সা সুমেরুযুগলস্তনী।
দীর্ঘৌ লম্বাবতিস্থূলৌ তাবতীব মনোহরৌ।। ৭
কর্কশাবতিকান্তৌ তৌ সর্ব্বানন্দপয়োনিধী।
ভক্তান্ সংপায়য়েদ্দেবী সর্ব্বকামদুঘৌ স্তনৌ।। ৮
খড়্গং পাত্রঞ্চ মুসলং লাঙ্গলঞ্চ বিভর্তি সা।
আখ্যাতা রক্তচামুণ্ডা দেবী যোগেশ্বরীতি চ।। ৯
অনয়া ব্যাপ্তমখিলং জগৎ স্থাবরজঙ্গমম্।
ইমাং যঃ পূজয়েদ্ ভক্ত্যা স ব্যাপ্নোতি চরাচরম্।
ভুক্ত্বা ভোগান্ যথাকামং দেবী সাযুজ্যমাপ্নুয়াৎ।। ১০
অধীতে যঃ ইদং নিত্যং রক্তদন্তা-বপুস্তবম্।
তং সা পরিচরেদ্দেবী পতিং প্রিয়মি-বাঙ্গনা।। ১১
শাকম্ভরী নীলবর্ণা নীলোৎপলবিলোচনা।
গম্ভীরনা-ভিস্ত্রিবলী-বিভূষিত-তনূদরী।
সুকর্কশ-সমোত্তুঙ্গ-বৃত্তপীনঘনস্তনী।। ১২
মুষ্টিং শিলীমুখাপূর্ণং কমলং কমলালয়া।
পুষ্পপলবমূলাদি-ফলাঢ্যং শাকসঞ্চয়ম্।। ১৩
কাম্যানন্তরসৈর্যুক্তং ক্ষুৎতৃণ্মৃত্যু-জরাপহম্।
কার্মুকঞ্চ স্ফুরৎকান্তিঃ বিভর্তি পরমেশ্বরী।। ১৪
শাকম্ভরী শতাক্ষী সা সৈব দুর্গা প্রকীর্তিতা।
বিশোকা দুষ্টদমনী শমনী দুরিতাপদাম্।
উমা গৌরী সতী চণ্ডী কালিকা সাপি পার্বতী।। ১৫
শাকম্ভরীং স্তুবন্ ধ্যায়ন্ জপন্ সম্পুজয়ন্নমন।
অক্ষষ্যমশ্নুতে শীঘ্রমন্নপানামৃতং ফলম্।। ১৬
ভীমাপি নীলবর্ণা সা দংষ্ট্রাদশন-ভাসুরা।
বিশাললোচনা নারী বৃত্তপীন-পয়োধরা।। ১৭
চন্দ্রহাসঞ্চ ডমরুং শিরঃপাত্রঞ্চ বিভ্রতী।
একবীরা কালরাত্রিঃ সৈবোক্তা কামদা স্তুতা।। ১৮
তেজোমণ্ডলদুর্ধর্ষা ভ্রামরী চিত্রকান্তিভৃৎ।
চিত্রানুলেপনা দেবী চিত্রাভরণভূষিতা।
চিত্রভ্রমরপাণিঃ সা মহামারীতি গীয়তে।। ১৯
ইত্যেতা মূর্তয়ো দেব্যা ব্যাখ্যাতা বসুধাধিপ।
জগন্মাতুশ্চণ্ডিকায়াঃ কীর্তিতাঃ কামধেনবঃ।। ২০
ইদং রহস্যং পরমং ন বাচ্যং যস্য কস্যচিৎ।
ব্যাখ্যানং দিব্যমূর্তীনামধীষ্বাবহিতঃ স্বয়ম্|| ২১
তস্মাৎ সর্ব্বপ্রযত্নেন দেবীং জপ নিরস্তরম্।
সপ্তজন্মার্জিতৈর্ঘোরৈর্ব্রহ্মহত্যাসমৈরপি।
পাঠমাত্রেণ মন্ত্রাণাং মুচ্যতে সর্ব্বকিল্বিষৈঃ।। ২২
দেব্যা ধ্যানং ময়াখ্যাতং গুহ্যাদ্ গুহ্যতরং মহৎ।
তস্মাৎ সর্ব্বপ্রযত্নেন সর্ব্বকামফলপ্রদম্।। ২৩
দেব্যাশ্চৈব প্রসাদেন সর্ব্বমান্যো ভবিষ্যসি।
শান্তিঃ পুষ্টিস্তথা লক্ষ্মীরেতৎ সর্ব্বং প্রযচ্ছতি।। ২৪
সর্ব্বরূপময়ী দেবী সর্ব্বং দেবীময়ং জগৎ।
অতোহহং বিশ্বরূপাং ত্বাং নমামি পরমেশ্বরীম্।। ২৫
ইতি শ্রীমার্কণ্ডেয়পুরাণে খিলাংশে মূর্তিরহস্যং সমাপ্তম্। |
