Maa Taramoyee

চতুর্থঃ অধ্যায়ঃ

চতুর্থঃ অধ্যায়ঃ ওঁ নমশ্চণ্ডিকায়ৈ। শক্রাদিকৃত দেবীস্তুতি
মূল	পাঠ সংকেত
ঋষিরুবাচ।। ১ শক্রাদয়ঃ সুরগণা নিহতেহতিবীর্য্যে, তস্মিন্‌ দুরাত্মনি সুরারিবলে চ দেব্যা। তাং তুষ্টুবুঃ প্রণতিনম্রশিরোধরাংসা, বাগ্‌ভিঃ প্রহর্ষ-পুলকোদ্‌গম-চারুদেহাঃ।। ২	ঋষিঃ উবাচ।। ১ শক্র-আদয়ঃ সুরগণাঃ নিহতে অতিবীর্য্যে, তস্মিন্‌ দুরাত্মনি সুর-অরি-বলে চ দেব্যা। তাং তুষ্টুবুঃ প্রণতি-নম্র-শিরোধর অংসা, বাগ্‌ভিঃ প্রহর্ষ-পুলক-উদ্‌গম-চারুদেহাঃ।। ২
দেব্যা যয়া ততমিদং জগদাত্মশক্ত্যা, নিঃশেষদেবগণ-শক্তিসমুহমূর্ত্ত্যা। তামম্বিকামখিল-দেবমহর্ষি-পূজ্যাং ভক্ত্যা নতাঃ স্ম বিদধাতু শুভানি সা নঃ।। ৩	দেব্যা যয়া ততম্‌ ইদং জগৎ আত্ম-শক্ত্যা, নিঃশেষ-দেবগণ-শক্তি-সমুহ-মূর্ত্ত্যা। তাম অম্বিকাম্ অখিল-দেব-মহর্ষি-পূজ্যাং ভক্তা নতাঃ স্ম বিদধাতু শুভানি সা নঃ।। ৩
যস্যাঃ প্রভাবমতুলং ভগবাননন্তো-ব্রহ্মা হরশ্চ নহি বক্তুমলং বলঞ্চ। সা চণ্ডিকাখিল-জগৎ-পরিপালনায়, নাশায় চাশুভভয়স্য মতিং করোতু।। ৪	যস্যাঃ প্রভাবম্‌ অতুলং ভগবান্‌ অনন্তঃ-ব্রহ্মা হরঃ চ ন হি বক্তুম্‌ অলং বলং চ। সা চণ্ডিকা অখিল-জগৎ-পরিপালনায়, নাশায় চ অশুভ-ভয়স্য মতিং করোতু।। ৪
যা শ্রীঃ স্বয়ং সুকৃতিনাং ভবেনষ্বলক্ষ্মীঃ, পাপাত্মনাং কৃতধিয়াং হৃদয়েষু বুদ্ধিঃ। শ্রদ্ধা সতাং কুলজনপ্রভবস্য লজ্জা, তাং ত্বাং নতাঃ স্ম পরিপালয় দেবি বিশ্বম্‌।। ৫	যা শ্রীঃ স্বয়ং সু-কৃতিনাং ভবেনষু অলক্ষ্মীঃ, পাপ-আত্মনাং কৃত-ধিয়াং হৃদয়েষু বুদ্ধিঃ। শ্রদ্ধা সতাং কুলজন-প্রভবস্য লজ্জা, তাং ত্বাং নতাঃ স্ম পরিপালয় দেবি বিশ্বম্‌।। ৫
কিং বর্ণয়াম তবরূপমচিন্ত্যমেতৎ, কিঞ্চাতিবীর্য্যমসুরক্ষয়কারি ভূরি। কিঞ্চাহবেষু চরিতানি তবাতি যানি, সর্ব্বেষু দেব্যসুরদেবগণাদিকেষু।। ৬	কিং বর্ণয়াম তব রূপম্‌ অচিন্ত্যম্‌ এতৎ, কিং চ অতিবীর্য্যম্‌ অসুর-ক্ষয়কারী ভূরি। কিং চ আহবেষু চরিতানি তবাতি যানি, সর্বেষু দেবি অসুর-দেব-গণ-আদিকেষু।। ৬
হেতুঃ সমস্তজগতাং ত্রিগুণাহপি দোষৈর্ন জ্ঞায়সে হরি-হরাদিভিরপ্যপারা। সর্ব্বাশ্রয়াখিলমিদং জগদংশভূত- মব্যাকৃতা হি পরমা প্রকৃতিস্ত্বমাদ্যা।।৭	হেতুঃ সমস্ত-জগতাং ত্রিগুণা অপি দোষৈঃ ন জ্ঞায়সে হরি-হর-আদিভিঃ অপি-অপারা। সর্ব-আশ্রয়া অখিলম্‌ ইদম্‌ জগৎ অংশভূতম্‌ অব্যাকৃতা হি পরমা প্রকৃতিঃ ত্বম্‌ আদ্যা।।৭
যস্যাঃ সমস্তসুরতা সমুদীরণেন, তৃপ্তিং প্রয়াতি সকলেষু মখেষু দেবি। স্বাহাসি বৈ পিতৃগণস্য চ তৃপ্তিহেতু- রুচ্চার্য্যসে ত্বমত এব জনৈঃ স্বধা চ।। ৮	যস্যাঃ সমস্ত সুরতা সমুদীরণেন, তৃপ্তিং প্রয়াতি সকলেষু মখেষু দেবি। স্বাহা অসি বৈ পিতৃগণস্য চ তৃপ্তি-হেতুঃ উচ্চার্য্যসে ত্বম্ অতঃ এব জনৈঃ স্বধা চ।। ৮
যা মুক্তিহেতু রবিচিন্ত্যমহাব্রতা চ, অভ্যস্যসে সুনিয়তেন্দ্রিয়-তত্ত্বসারৈঃ। মোক্ষার্থিভির্মুনিভি-রস্তসমস্তদোষৈ- র্বিদ্যাসি সা ভগবতী পরমা হি দেবি।। ৯	যা মুক্তি-হেতুঃ অবিচিন্ত্য-মহাব্রতা চ, অভ্যস্যসে সু-নিয়ত-ইন্দ্রিয়-তত্ত্ব-সারৈঃ। মোক্ষ-অর্থিভিঃ মুনিভিঃ অস্ত-সমস্ত-দোষৈঃ বিদ্যা অসি সা ভগবতী পরমা হি দেবি।। ৯
শব্দাত্মিকা সুবিমলর্গ্‌যজুষাং নিধান- মুদ্গীথরম্যপদ-পাঠবতাঞ্চ সাম্নাম্‌। দেবী ত্রয়ী ভগবতী ভবভাবনায়, বার্ত্তা চ সর্ব্বজগতাং পরমার্ত্তিহন্ত্রী।। ১০	শব্‌দ-আত্মিকা সু-বিমল-ঋক্‌-যজুষাং নিধানম্‌ উদ্‌গীথ-রম্য-পদ-পাঠবতাং চ সাম্নাম্‌। দেবী ত্রয়ী ভগবতী ভব-ভাবনায়, বার্তা চ সর্বজগতাং পরম-আর্তি-হন্ত্রী।। ১০
মেধাহসি দেবি বিদিতাখিলশাস্ত্রসারা, দুর্গাহসি দুর্গ-ভবসাগরনৌরসঙ্গা। শ্রীঃ কৈটভারি-হৃদয়ৈক-কৃতাধিবাসা, গৌরী ত্বমেব শশিমৌলিকৃত-প্রতিষ্ঠা।। ১১	মেধা অসি দেবি বিদিত-অখিল-শাস্ত্র-সারা, দুর্গা অসি দুর্গ-ভব-সাগর-নৌঃ অ-সঙ্গা। শ্রীঃ কৈটভ-অরি-হৃদয়-এককৃত-অধিবাসা, গৌরী ত্বম্‌ এব শশি-মৌলি-কৃত-প্রতিষ্ঠা।। ১১
ঈষৎ-সহাসমমলং পরিপূর্ণচন্দ্র- বিম্বানুকারি কনকোত্তমকান্তি কান্তম্। অত্যদ্ভূতং প্রহৃতমাপ্তরুষা তথাপি, বক্ত্রং বিলোক্য সহসা মহিষাসুরেণ।। ১২	ঈষৎ স-হাসম্‌ অমলং পরিপূর্ণ চন্দ্র- বিম্ব-অনুকারি কনক-উত্তম-কান্তি-কান্তম্। অতি-অদ্ভূতং প্রহৃতম্‌ আপ্ত-রুষা তথা অপি, বক্ত্রং বিলোক্য সহসা মহিষ-অসুরেণ।। ১২
দৃষ্ট্ব্বা তু দেবি! কুপিতং ভৃকুটীকরাল- মুদ্যচ্ছশাঙ্কসদৃশচ্ছবি যন্ন সদ্যঃ। প্রাণান্মুমোচ মহিষস্তদতীব চিত্রং, কৈর্জীব্যতে হি কুপিতান্তক দর্শনেন।। ১৩	দৃষ্ট্ব্বা তু দেবি! কুপিতং ভ্রু-কুটী-করালম্‌- উদ্যৎ-শশাঙ্ক-সদৃশ-ছবি যৎ ন সদ্যঃ। প্রাণান্‌ মুমোচ মহিষঃ তৎ অতীব চিত্রং, কৈঃ জীব্যতে হি কুপিত-অন্তক-দর্শনেন।। ১৩
দেবি প্রসীদ পরমা ভবতী ভবায়, সদ্যো বিনাশয়সি কোপবতী কুলানি। বিজ্ঞাতমেতদধুনৈব যদস্তমেতন্নীতং বলং সুবিপুলং মহিষাসুরস্য।। ১৪	দেবি প্রসীদ পরমা ভবতী ভবায়, সদ্যঃ বিনাশয়সি কোপবতী কুলানি। বিজ্ঞাতম্‌ এতৎ অধুনা এব যৎ অস্তম্‌ এতৎ নীতং বলং সু-বিপুলম্‌ মহিষাসুরস্য।। ১৪
তে সম্মতা জনপদেষু ধনানি তেষাং, তেষাং যশাংসি ন চ সীদতি ধর্ম্মবর্গঃ। ধন্যাস্ত এব নিভৃতাত্মজভৃত্যদারা, যেষাং সদাভ্যুদয়দা ভবতী প্রসন্না।। ১৫	তে সম্মতা জন-পদেষু ধনানি তেষাং, তেষাং যশাংসি ন চ সীদতি ধর্ম-বর্গঃ। ধন্যাঃ তে এব নিভৃত-আত্মজ-ভৃত্য-দারাঃ, যেষাং সদা অভ্যুদয়-দা ভবতী প্রসন্না।। ১৫
ধর্ম্ম্যাণি দেবি সকলানি সদৈব কর্ম্মাণ্য- ত্যাদৃতঃ প্রতিদিনং সুকৃতী করোতি। স্বর্গং প্রয়াতি চ ততো ভবতী প্রসাদা- ল্লোকত্রয়েহপি ফলদা ননু দেবি! তেন।। ১৬	ধর্ম্যাণি দেবি সকলানি সদা এব কর্মাণি অতি-আদৃতঃ প্রতিদিনং সু-কৃতী করোতি। স্বর্গং প্রয়াতি চ ততঃ ভবতী প্রসাদাৎ লোক-ত্রয়ে-অপি ফলদা ননু দেবি! তেন।। ১৬
দুর্গে স্মৃতা হরসি ভীতিমশেষজন্তোঃ, স্বস্থৈঃ স্মৃতা মতিমতীব শুভাং দদাসি। দারিদ্র-দুঃখভয়-হারিণি কা ত্বদন্যা, সর্ব্বোপকার-করণায় সদার্দ্রচিত্তা।। ১৭	দুর্গে স্মৃতা হরসি ভীতিম্‌ অশেষ-জন্তোঃ, স্ব-স্থৈঃ স্মৃতা মতিং অতীব শুভাং দদাসি। দারিদ্র-দুঃখ-ভয়-হারিণি কা ত্বৎ-অন্যা, সর্ব-উপকার-করণায় সদা আর্দ্র-চিত্তা।। ১৭
এভির্হতৈর্জগদুপৈতি সুখং তথৈতে, কুর্ব্বন্তু নাম নরকার চিরায় পাপম্‌। সংগ্রামমৃত্যুমধিগম্য দিবং প্রয়ান্তু, মত্বেতি নূনমহিতান্‌ বিনিহংসি দেবি।। ১৮	এভিঃ হতৈঃ জগৎ উপৈতি সুখং তথা এতে, কুর্বন্তু নাম নরকার চিরায় পাপম্‌। সংগ্রাম-মৃত্যুং অধিগম্য দিবং প্রয়ান্তু, মত্বা ইতি নূনং অহিতান্‌ বিনিহংসি দেবি।। ১৮
দৃষ্ট্বৈব কিন্ন ভবতী প্রকরোতি ভস্ম, সর্ব্বাসুরানরিষু যৎ প্রহিণোষি শস্ত্রম্‌। লোকান্‌ প্রয়ান্তু রিপবোহপি হি শস্ত্রপূতাঃ, ইত্থং মতির্ভবতি তেষ্বপি তেহতিসাধ্বী।। ১৯	দৃষ্ট্বা এব কিং ন ভবতী প্রকরোতি ভস্ম, সর্ব-অসুরান্‌ অরিষু যৎ প্রহিণোষি শস্ত্রম্‌। লোকান্‌ প্রয়ান্তু রিপবঃ অপি হি শস্ত্র-পূতাঃ, ইত্থং মতিঃ ভবতি তেষু অপি তে অতিসাধ্বী।। ১৯
খড়্গপ্রভা-নিকর-বিস্ফুরনৈস্তথোগ্রৈঃ, শূলাগ্র-কান্তিনিবহেন দৃশোহসুরাণাম্‌। যন্নাগতা বিলয়মং-শুমদিন্দু-খণ্ড- যোগ্যাননং তব বিলোকয়তাং তদেতৎ।। ২০	খড়্গ-প্রভা-নিকর-বিস্ফুরনৈঃ তথা উগ্রৈঃ, শূল-অগ্র-কান্তি-নিবহেন দৃশঃ অসুরাণাম্‌। যৎ ন আগতাঃ বিলয়ম্‌ অংশুমৎ-ইন্দু-খণ্ড যোগ্য-আননং তব বিলোকয়তাং তৎ এতৎ।। ২০
দুর্বৃত্তবৃত্তশমনং তব দেবি! শীলং, রূপং তথৈতদবিচিন্ত্যমতুল্যমন্যৈঃ। বীর্য্যঞ্চ হন্ত্‌ হৃতদেবপরাক্রমাণাং, বৈরিষ্বপি প্রকটিতৈব দয়া ত্বয়েত্থম্‌।। ২১	দুর্বৃত্ত-বৃত্ত-শমনং তব দেবি! শীলং, রূপং তথা এতৎ অবিচিন্ত্যম্‌ অতুলম্‌ অন্যৈঃ। বীর্য্যং চ হন্ত্‌ হৃত-দেব-পরাক্রমাণাং, বৈরিষু অপি প্রকটিতা এব দয়া ত্বয়া ইত্থম্‌।। ২১
কেনোপমা ভবতু তেহস্য পরাক্রমস্য, রূপঞ্চ শত্রুভয়কার্য্যতিহারি কুত্র। চিত্তে কৃপা সমরনিষ্ঠুরতা চ দৃষ্টা, ত্বয্যেব দেবি! বরদে! ভুবনত্রয়েহপি।। ২২	কেন উপমা ভবতু তে অস্য পরাক্রমস্য, রূপং চ শত্রু-ভয়-কারি অতিহারি কুত্র। চিত্তে কৃপা সমর-নিষ্ঠুরতা চ দৃষ্টা, ত্বয়ি এব দেবি বর-দে! ভুবনত্রয়ে অপি।। ২২
ত্রৈলোক্যমেতদখিলং রিপুনাশনেন, ত্রাতং ত্বয়া সমরমূর্দ্ধনি তেহপি হত্বা। নীতা দিবং রিপুগণা ভয়মপ্যপাস্ত- মস্মাকমুন্মদ-সুরারিভবং নমস্তে।। ২৩	ত্রৈলোক্যম্‌ এতৎ অখিলং রিপু-নাশনেন, ত্রাতং ত্বয়া সমর-মূর্ধনি তে অপি হত্বা। নীতাঃ দিবং রিপুগণাঃ ভয়ম্‌ অপি- অপাস্তম্‌ অস্মাকম্‌ উন্মদ-সুর-অরি-ভবং নমস্তে।। ২৩
শূলেন পাহি নো দেবি! পাহি খড়্গেন চাম্বিকে। ঘন্টাস্বনেন নঃ পাহি চাপজ্যানিঃস্বনেন চ।। ২৪	শূলেন পাহি নঃ দেবি পাহি খড়্গেন চ অম্বিকে। ঘন্টাস্বনেন নঃ পাহি চাপ-জ্যা-নিঃস্বনেন চ।। ২৪
প্রাচ্যাং রক্ষ প্রতীচ্যাঞ্চ চণ্ডিকে রক্ষ দক্ষিণে। ভ্রামণেনাত্মশূলস্য উত্তরস্যাং তথেশ্বরি।। ২৫	প্রাচ্যাং রক্ষ প্রতীচ্যাং চ চণ্ডিকে রক্ষ দক্ষিণে। ভ্রামণেন আত্ম-শূলস্য উত্তরস্যাং তথেশ্বরি।। ২৫
সৌম্যানি যানি রূপাণি ত্রৈলোক্যে বিচরন্তি তে। যানি চাত্যর্থ-ঘোরাণি তৈ রক্ষাস্মাংস্তথা ভুবম্‌।। ২৬	সৌম্যানি যানি রূপাণি ত্রৈলোক্যে বিচরন্তি তে। যানি চ অত্যর্থ-ঘোরাণি তৈঃ রক্ষ-অস্মান্‌ তথা ভুবম্‌।। ২৬
খড়্গশূলগদাদীনি যানি চাস্ত্রাণি তেহম্বিকে। করপলবসঙ্গীনি তৈরস্মান্‌ রক্ষ সর্ব্বতঃ।। ২৭	খড়্গ-শূল-গদ-আদীনি যানি চ অস্ত্রাণি তে অম্বিকে। কর-পলব-সঙ্গীনি তৈঃ অস্মান্‌ রক্ষ সর্বতঃ।। ২৭
ঋষিরুবাচ।। ২৮ এবং স্তুতা সুরৈর্দিব্যৈঃ কুসুমৈর্নন্দনোদ্ভবৈঃ। অর্চ্চিতা জগতাং ধাত্রী তথা গন্ধানুলেপনৈঃ।। ২৯	ঋষিঃ উবাচ।। ২৮ এবং স্তুতা সুরৈঃ দিব্যৈঃ কুসুমৈঃ নন্দনঃ-উদ্ভবৈঃ। অর্চিতা জগতাং ধাত্রী তথা গন্ধ-অনুলেপনৈঃ।। ২৯
ভক্ত্যা সমস্তৈস্ত্রিদশৈ র্দিব্যৈ র্ধূ পৈস্তু ধূপিতা। প্রাহ প্রসাদ-সুমুখী সমস্তান্‌ প্রণতান্‌ সুরান্‌।। ৩০	ভক্ত্যা সমস্তৈঃ ত্রি-দশৈঃ দিব্যৈঃ ধূপৈঃ তু-ধূপিতা। প্রাহ প্রসাদ-সুমুখী সমস্তান্‌ প্রণতান্‌ সুরান্‌।। ৩০
দেব্যুবাচ।। ৩১ ব্রিয়তাং ত্রিদশাঃ সর্ব্বে যদস্মত্তোহভিবাঞ্ছিতম্‌।। ৩২ (দদাম্যহ-মতিপ্রীত্যা স্তবৈরেভিঃ সুপূজিতা।।)	দেবী উবাচ।। ৩১ ব্রিয়তাং ত্রি-দশাঃ সর্বে যৎ অস্মত্তঃ অভিবাঞ্ছিতম্‌।। ৩২ (দদামি অহম্‌ অতি প্রীত্যা স্তবৈঃ এভিঃ সু-পূজিতা।।)
দেবা ঊচুঃ।। ৩৩ ভগবত্যা কৃতং সর্ব্বং ন কিঞ্চিদবশিষ্যতে। যদয়ং নিহতঃ শত্রুরস্মাকং মহিষাসুরঃ।। ৩৪	দেবাঃ উচুঃ।। ৩৩ ভগবত্যা কৃতং সর্বং ন কিঞ্চিৎ অবশিষ্যতে। যৎ অয়ং নিহতঃ শত্রুঃ অস্মাকং মহিষাসুরঃ।। ৩৪
যদি বাপি বরো দেয়স্ত্বয়াস্মাকং মহেশ্বরি। সংস্মৃতা সংস্মৃতা ত্বং নো হিংসেথাঃ পরমাপদঃ।। ৩৫	যদি বা অপি বরঃ দেয়ঃ ত্বয়া অস্মাকং মহেশ্বরি। সংস্মৃতা সংস্মৃতা ত্বং নঃ হিংসেথাঃ পরম্‌ আপদঃ।। ৩৫
যশ্চ মর্ত্ত্যঃ স্তবৈরেভিস্ত্বাং স্তোষ্যত্যমলাননে। তস্য বিত্তর্দ্ধিবিভবৈর্ধনদারাদিসম্পদাম্‌।। ৩৬	যঃ চ মর্ত্যঃ স্তবৈঃ এভিঃ ত্বাং স্তোষ্যতি অমল-আননে। তস্য বিত্ত-ঋদ্ধি-বিভবৈঃ ধন-দার-আদি-সম্পদাম্‌।। ৩৬
বৃদ্ধয়েহস্মৎপ্রসন্না ত্বং ভবেথাঃ সর্ব্বদাম্বিকে।। ৩৭	বৃদ্ধয়ে অস্মৎ-প্রসন্না ত্বং ভবেথাঃ সর্বদা অম্বিকে।। ৩৭
ঋষিরুবাচ।। ৩৮ ইতি প্রসাদিতা দেবৈর্জ্জগতোহর্থে তথাত্মনঃ। তথেত্যুক্ত্বা ভদ্রকালী বভূবান্তর্হিতা নৃপ।। ৩৯	ঋষিঃ উবাচ।। ৩৮ ইতি প্রসাদিতা দেবৈঃ জগতঃ অর্থে তথা আত্মনঃ। তথা ইতি উক্ত্বা ভদ্রকালী বভূব অন্তর্হিতা নৃপ।। ৩৯
ইত্যেতৎ কথিতং ভূপ সম্ভূতা সা যথা পুরা। দেবী দেবশরীরেভ্যো জগত্রয়হিতৈষিণী।। ৪০	ইতি এতৎ কথিতং ভূপ সম্ভূতা সা যথা পুরা। দেবী দেব-শরীরেভ্যঃ জগৎ-ত্রয়-হিতৈষিণী।। ৪০
পুনশ্চ গৌরী-দেহা সা সমুম্ভূতা যথাহভবৎ। বধায় দুষ্টদৈত্যানাং তথা শুম্ভনিশুম্ভয়োঃ।। ৪১	পুনঃ চ গৌরী-দেহা সা সমুম্ভূতা যথা-অভবৎ। বধায় দুষ্ট-দৈত্যানাং তথা শুম্ভ-নিশুম্ভয়োঃ।। ৪১
রক্ষণায় চ লোকানাং দেবানামুপকারিণী। তচ্ছৃণুষ্ব ময়াখ্যাতং যথাবৎ কথয়ামি তে।। ৪২	রক্ষণায় চ লোকানাং দেবানাম্‌ উপকারিণী। তৎ শৃণুষ্ব ময়া আখ্যাতং যথাবৎ কথয়ামি তে।। ৪২
ইতি মার্কণ্ডেয় পুরাণে সাবর্ণিকে মন্বন্তরে দেবীমাহাত্ম্যে শক্রাদিকৃতদেবীস্তুতিঃ।। ৪র্থ অঃ।।