Maa Taramoyee

পঞ্চমঃ অধ্যায়ঃ

পঞ্চমঃ অধ্যায়ঃ উত্তর চরিত্র দেব্যা দূতসংবাদ ওঁ নমশ্চণ্ডিকায়ৈ। ওঁ অস্য শ্রীউত্তরচরিত্রস্য রুদ্র ঋষিঃ, শ্রীমহাসরস্বতী দেবতা, অনুষ্টুপ্ছন্দঃ ভীমাশক্তিঃ, ভ্রামরীবীজম্, সূর্য্যস্তত্বম্, সামবেদঃ স্বরূপম্। শ্রীমহাসরস্বতী প্রীত্যর্থং উত্তরচরিত্র-জপে বিনিয়োগঃ।
মূল	পাঠ সংকেত
শ্রী শ্রীমহাসরস্বতী ধ্যানম্। ওঁ ঘন্টা-শূলহলানি শঙ্খমুসলে চক্রং ধনুঃ সায়কং হস্তাব্জৈর্দধতীং ঘনান্তবিলসচ্ছীতাংশুতুল্যপ্রভাম্। গৌরীদেহসমুদ্ভবাং ত্রিজগতামাধারভূতাং মহা- পূর্ব্বামত্র সরস্বতীমনুভজে শুম্ভাদিদৈত্যার্দ্দিনীম্।।	শ্রী শ্রীমহাসরস্বতী ধ্যানম্। ওঁ ঘন্টা-শূল-হলানি শঙ্খ-মুসলে চক্রং ধনুঃ সায়কং হস্ত-অব্জৈঃ দধতীং ঘন-অন্ত-বিলসৎ-শীত-অংশু-তুল্য-প্রভাং। গৌরী-দেহ-সমুদ্ভবাং ত্রি-জগতাম্ আধার-ভূতাং মহা-অপূর্বাম্-অত্র সরস্বতীম্ অনুভজে শুম্ভ-আদি-দৈত্য-অর্দ্দিনীম্।।
(ওঁ ঐং) ঋষিরুবাচ।। ১ পুরা শুম্ভ-নিশুম্ভাভ্যামসুরাভ্যাং শচীপতেঃ। ত্রৈলোক্যং যজ্ঞ-ভাগাশ্চ হৃতা মদবলাশ্রয়াৎ।। ২	(ওঁ ঐং) ঋষিঃ উবাচ।। ১ পুরা শুম্ভ-নিশুম্ভাভ্যাম্‌ অসুরাভ্যাং শচীপতেঃ। ত্রৈলোক্যং যজ্ঞঃ-ভাগাঃ চ হৃতাঃ মদ-বল-আশ্রয়াৎ।। ২
তাবেব সূর্য্যতাং তদ্বদধিকারং তথৈন্দবম্‌। কৌবেরমথ যাম্যঞ্চ চক্রাতে বরুণস্য চ।। ৩	তৌ এব সূর্য্যতাং তৎ-বৎ অধিকারং তথা ঐন্দবম্‌। কৌবেরম্‌ অথ যাম্যং চ চক্রাতে বরুণস্য চ।। ৩
তাবেব পবনর্দ্ধিঞ্চ চক্রতুর্বহ্নিকর্ম্ম চ। ততো দেবা বিনির্দ্ধুতা ভ্রষ্টরাজ্যাঃ পরাজিতাঃ।। ৪	তৌ এব পবন-ঋদ্ধিম্‌ চ চক্রতুঃ বহ্নি-কর্ম চ। ততঃ দেবাঃ বিনির্ধূতা ভ্রষ্ট-রাজ্যাঃ পরাজিতাঃ।। ৪
হৃতাধিকারাস্ত্রিদশাস্তাভ্যাং সর্ব্বে নিরাকৃতাঃ। মহাসুরাভ্যাং তাং দেবীং সংস্মরন্ত্যপরাজিতাম্‌।। ৫	হৃত-অধিকারাঃ ত্রি-দশাঃ তাভ্যাং সর্বে নিরাকৃতাঃ। মহাসুরাভ্যাং তাং দেবীং সংস্মরন্তি অপরাজিতাম্‌।। ৫
তয়াস্মাকং বরো দত্তো যথাপৎসু স্মৃতাখিলাঃ। ভবতাং নাশয়িষ্যামি তৎক্ষণাৎ পরমাপদঃ।। ৬	তয়া অস্মাকং বরঃ দত্তঃ যথা আপৎসু স্মৃতা অখিলাঃ। ভবতাং নাশয়িষ্যামি তৎক্ষণাৎ পরম-আপদঃ।। ৬
ইতি কৃত্বা মতিং দেবা হিমবন্তং নগেশ্বরম্‌। জগ্মুস্তত্র ততো দেবীং বিষ্ণুমায়াং প্রতুষ্টুবুঃ।। ৭	ইতি কৃত্বা মতিং দেবাঃ হিমবন্তং নগ-ঈশ্বরম্‌। জগ্মুঃ তত্র ততঃ দেবীং বিষ্ণু-মায়াং প্রতুষ্টুবুঃ।। ৭
দেবা ঊচুঃ।। (ওঁ ঐং) ৮ নমো দেব্যৈ মহাদেব্যৈ শিবায়ৈ সততং নমঃ। নমঃ প্রকৃত্যৈ ভদ্রায়ৈ নিয়তাঃ প্রণতাঃ স্ম তাম্‌।। ৯	দেবাঃ ঊচুঃ।। (ওঁ ঐং) ৮ নমঃ দেব্যৈ মহাদেব্যৈ শিবায়ৈ সততং নমঃ। নমঃ প্রকৃত্যৈ ভদ্রায়ৈ নিয়তাঃ প্রণতাঃ স্ম তাম্‌।। ৯
রৌদ্রায়ৈ নমো নিত্যায়ৈ গৌর্য্যে ধাত্র্যৈ নমো নমঃ। জ্যোৎস্নায়ৈ চেন্দুরূপিণ্যৈ সুখায়ৈ সততং নমঃ।। ১০	রৌদ্রায়ৈ নমঃ নিত্যায়ৈ গৌর্য্যে ধাত্র্যৈ নমঃ নমঃ। জ্যোৎস্নায়ৈ চ ইন্দু-রূপিণ্যৈ সুখায়ৈ সততং নমঃ।। ১০
কল্যাণ্যৈ প্রণতা বৃদ্ধ্যৈ সিদ্ধ্যৈ কূর্ম্মো নমো নমঃ। নৈর্ঋত্যৈ ভুভৃতাং লক্ষ্ম্যৈ শর্ব্বাণৈ তে নমো নমঃ।। ১১	কল্যাণ্যৈ প্রণতাঃ বৃদ্ধ্যৈ সিদ্ধ্যৈ কূর্মঃ নমঃ নমঃ। নৈর্ঋত্যৈ ভু-ভৃতাং লক্ষ্ম্যৈ শর্বাণৈ তে নমঃ নমঃ।। ১১
দুর্গায়ৈ দুর্গপারায়ৈ সারায়ৈ সর্ব্বকারিণ্যৈ। খ্যাত্যৈ তথৈব কৃষ্ণায়ৈ ধুম্রায়ৈ সততং নমঃ।। ১২	দুর্গায়ৈ দুর্গ-পারায়ৈ সারায়ৈ সর্বকারিণ্যৈ। খ্যাত্যৈ তথা এব কৃষ্ণায়ৈ ধুম্রায়ৈ সততং নমঃ।। ১২
অতিসৌম্যাতিরৌদ্রায়ৈ নতাস্তস্যৈ নমো নমঃ। নমো জগৎপ্রতিষ্ঠায়ৈ দেব্যৈ কৃত্যৈ নমো নমঃ।। ১৩	অতিসৌম্য-অতিরৌদ্রায়ৈ নতাঃ তস্যৈ নমো নমঃ। নমঃ জগৎ-প্রতিষ্ঠায়ৈ দেব্যৈ কৃত্যৈ নমঃ নমঃ।। ১৩
যা দেবী সর্ব্বভূতেষু বিষ্ণুমায়েতি শব্দিতা। নমস্তস্যৈ।। ১৪ নমস্তস্যৈ।। ১৫ নমস্তস্যৈ নমো নমঃ।। ১৬	যা দেবী সর্বভূতেষু বিষ্ণুমায়া ইতি শব্‌দিতা। নমঃ তস্যৈ।। ১৪ নমঃ তস্যৈ।। ১৫ নমঃ তস্যৈ নমঃ নমঃ।। ১৬
যা দেবী সর্ব্বভূতেষু চেতনেত্যভিধীয়তে। নমস্তস্যৈ।। ১৭ নমস্তস্যৈ।। ১৮ নমস্তস্যৈ নমো নমঃ।। ১৯	যা দেবী সর্র্বভূতেষু চেতনা ইতি অভিধীয়তে। নমঃ তস্যৈ।। ১৭ নমঃ তস্যৈ।। ১৮ নমঃ তস্যৈ নমঃ নমঃ।। ১৯
যা দেবী সর্ব্বভূতেষু বুদ্ধিরূপেণ সংস্থিতা। নমস্তস্যৈ।। ২০ নমস্তস্যৈ।। ২১ নমস্তস্যৈ নমো নমঃ।। ২২	যা দেবী সর্ব-ভূতেষু বুদ্ধি-রূপেণ সংস্থিতা। নমঃ তস্যৈ।। ২০ নমঃ তস্যৈ।। ২১ নমঃ তস্যৈ নমঃ নমঃ।। ২২
যা দেবী সর্ব্বভূতেষু নিদ্রারূপেণ সংস্থিতা। নমস্তস্যৈ।। ২৩ নমস্তস্যৈ।। ২৪ নমস্তস্যৈ নমো নমঃ।। ২৫	যা দেবী সর্ব-ভূতেষু নিদ্রা-রূপেণ সংস্থিতা। নমঃ তস্যৈ।। ২৩ নমঃ তস্যৈ।। ২৪ নমঃ তস্যৈ নমঃ নমঃ।। ২৫
যা দেবী সর্ব্বভূতেষু ক্ষুধারূপেণ সংস্থিতা। নমস্তস্যৈ।। ২৬ নমস্তস্যৈ।। ২৭ নমস্তস্যৈ নমো নমঃ।। ২৮	যা দেবী সর্ব-ভূতেষু ক্ষুধা-রূপেণ সংস্থিতা। নমঃ তস্যৈ।। ২৬ নমঃ তস্যৈ।। ২৭ নমঃ তস্যৈ নমঃ নমঃ।। ২৮
যা দেবী সর্ব্বভূতেষু চ্ছায়ারূপেণ সংস্থিতা। নমস্তস্যৈ।। ২৯ নমস্তস্যৈ।। ৩০ নমস্তস্যৈ নমো নমঃ।। ৩১	যা দেবী সর্ব-ভূতেষু ছায়া-রূপেণ সংস্থিতা। নমঃ তস্যৈ।। ২৯ নমঃ তস্যৈ।। ৩০ নমঃ তস্যৈ নমঃ নমঃ।। ৩১
যা দেবী সর্ব্বভূতেষু শক্তিরূপেণ সংস্থিতা। নমস্তস্যৈ।। ৩২ নমস্তস্যৈ।। ৩৩ নমস্তস্যৈ নমো নমঃ।। ৩৪	যা দেবী সর্ব-ভূতেষু শক্তি-রূপেণ সংস্থিতা। নমঃ তস্যৈ।। ৩২ নমঃ তস্যৈ।। ৩৩ নমঃ তস্যৈ নমঃ নমঃ।। ৩৪
যা দেবী সর্ব্বভূতেষু তৃষ্ণারূপেণ সংস্থিতা। নমস্তস্যৈ।। ৩৫ নমস্তস্যৈ।। ৩৬ নমস্তস্যৈ নমো নমঃ।। ৩৭	যা দেবী সর্বভূতেষু তৃষ্ণা-রূপেণ সংস্থিতা। নমঃ তস্যৈ।। ৩৫ নমঃ তস্যৈ।। ৩৬ নমঃ তস্যৈ নমঃ নমঃ।। ৩৭
যা দেবী সর্ব্বভূতেষু ক্ষান্তিরূপেণ সংস্থিতা। নমস্তস্যৈ।। ৩৮ নমস্তস্যৈ।। ৩৯ নমস্তস্যৈ নমো নমঃ।। ৪০	যা দেবী সর্ব-ভূতেষু ক্ষান্তিরূপেণ সংস্থিতা। নমঃ তস্যৈ।। ৩৮ নমঃ তস্যৈ।। ৩৯ নমঃ তস্যৈ নমঃ নমঃ।। ৪০
যা দেবী সর্ব্বভূতেষু জাতিরূপেণ সংস্থিতা। নমস্তস্যৈ।। ৪১ নমস্তস্যৈ।। ৪২ নমস্তস্যৈ নমো নমঃ।। ৪৩	যা দেবী সর্ব-ভূতেষু জাতি-রূপেণ সংস্থিতা। নমঃ তস্যৈ।। ৪১ নমঃ তস্যৈ।। ৪২ নমঃ তস্যৈ নমঃ নমঃ।। ৪৩
যা দেবী সর্ব্বভূতেষু লজ্জারূপেণ সংস্থিতা। নমস্তস্যৈ।। ৪৪ নমস্তস্যৈ।। ৪৫ নমস্তস্যৈ নমো নমঃ।। ৪৬	যা দেবী সর্ব-ভূতেষু লজ্জা-রূপেণ সংস্থিতা। নমঃ তস্যৈ।। ৪৪ নমঃ তস্যৈ।। ৪৫ নমঃ তস্যৈ নমঃ নমঃ।। ৪৬
যা দেবী সর্ব্বভূতেষু শান্তিরূপেণ সংস্থিতা। নমস্তস্যৈ।। ৪৭ নমস্তস্যৈ।। ৪৮ নমস্তস্যৈ নমো নমঃ।। ৪৯	যা দেবী সর্ব-ভূতেষু শান্তি-রূপেণ সংস্থিতা। নমঃ তস্যৈ।। ৪৭ নমঃ তস্যৈ।। ৪৮ নমঃ তস্যৈ নমঃ নমঃ।। ৪৯
যা দেবী সর্ব্বভূতেষু শ্রদ্ধারূপেণ সংস্থিতা। নমস্তস্যৈ।। ৫০ নমস্তস্যৈ।। ৫১ নমস্তস্যৈ নমো নমঃ।। ৫২	যা দেবী সর্ব-ভূতেষু শ্রদ্ধা-রূপেণ সংস্থিতা। নমঃ তস্যৈ।। ৫০ নমঃ তস্যৈ।। ৪১ নমঃ তস্যৈ নমঃ নমঃ।। ৫২
যা দেবী সর্ব্বভূতেষু কান্তিরূপেণ সংস্থিতা। নমস্তস্যৈ।। ৫৩ নমস্তস্যৈ।। ৫৪ নমস্তস্যৈ নমো নমঃ।। ৫৫	যা দেবী সর্ব-ভূতেষু কান্তি-রূপেণ সংস্থিতা। নমঃ তস্যৈ।। ৫৩ নমঃ তস্যৈ।। ৫৪ নমঃ তস্যৈ নমঃ নমঃ।। ৫৫
যা দেবী সর্ব্বভূতেষু লক্ষ্মীরূপেণ সংস্থিতা। নমস্তস্যৈ।। ৫৬ নমস্তস্যৈ।। ৫৭ নমস্তস্যৈ নমো নমঃ।। ৫৮	যা দেবী সর্ব-ভূতেষু লক্ষ্মী-রূপেণ সংস্থিতা। নমঃ তস্যৈ।। ৫৬ নমঃ তস্যৈ।। ৫৭ নমঃ তস্যৈ নমঃ নমঃ।। ৫৮
যা দেবী সর্ব্বভূতেষু বৃত্তিরূপেণ সংস্থিতা। নমস্তস্যৈ।। ৫৯ নমস্তস্যৈ।। ৬০ নমস্তস্যৈ নমো নমঃ।। ৬১	যা দেবী সর্ব-ভূতেষু বৃত্তি-রূপেণ সংস্থিতা। নমঃ তস্যৈ।। ৫৯ নমঃ তস্যৈ।। ৬০ নমঃ তস্যৈ নমঃ নমঃ।। ৬১
যা দেবী সর্ব্বভূতেষু স্মৃতিরূপেণ সংস্থিতা। নমস্তস্যৈ।। ৬২নমস্তস্যৈ।। ৬৩ নমস্তস্যৈ নমো নমঃ।। ৬৪	যা দেবী সর্ব-ভূতেষু স্মৃতি-রূপেণ সংস্থিতা। নমঃ তস্যৈ।। ৬২ নমঃ তস্যৈ।। ৬৩ নমঃ তস্যৈ নমঃ নমঃ।। ৬৪
যা দেবী সর্ব্বভূতেষু দয়ারূপেণ সংস্থিতা। নমস্তস্যৈ।। ৬৫ নমস্তস্যৈ।। ৬৬ নমস্তস্যৈ নমো নমঃ।। ৬৭	যা দেবী সর্ব-ভূতেষু দয়া-রূপেণ সংস্থিতা। নমঃ তস্যৈ।। ৬৫ নমঃ তস্যৈ।। ৬৬ নমঃ তস্যৈ নমঃ নমঃ।। ৬৭
যা দেবী সর্ব্বভূতেষু তুষ্টিরূপেণ সংস্থিতা। নমস্তস্যৈ।। ৬৮ নমস্তস্যৈ।। ৬৯ নমস্তস্যৈ নমো নমঃ।। ৭০	যা দেবী সর্ব-ভূতেষু তুষ্টি-রূপেণ সংস্থিতা। নমঃ তস্যৈ।। ৬৮ নমঃ তস্যৈ।। ৬৯ নমঃ তস্যৈ নমঃ নমঃ।। ৭০
যা দেবী সর্ব্বভূতেষু মাতৃরূপেণ সংস্থিতা। নমস্তস্যৈ।। ৭১ নমস্তস্যৈ।। ৭২ নমস্তস্যৈ নমো নমঃ।। ৭৩	যা দেবী সর্ব-ভূতেষু মাতৃ-রূপেণ সংস্থিতা। নমঃ তস্যৈ।। ৭১ নমঃ তস্যৈ।। ৭২ নমঃ তস্যৈ নমঃ নমঃ।। ৭৩
যা দেবী সর্ব্বভূতেষু ভ্রান্তিরূপেণ সংস্থিতা। নমস্তস্যৈ।। ৭৪ নমস্তস্যৈ।। ৭৫ নমস্তস্যৈ নমো নমঃ।। ৭৬	যা দেবী সর্ব-ভূতেষু ভ্রান্তি-রূপেণ সংস্থিতা। নমঃ তস্যৈ।। ৭৪ নমঃ তস্যৈ।। ৭৫ নমঃ তস্যৈ নমঃ নমঃ।। ৭৬
ইন্দ্রিয়াণামধিষ্ঠাত্রী ভূতানাঞ্চাখিলেষু যা। ভূতেষু সততং তস্যৈ ব্যাপ্তিদেব্যৈ নমো নমঃ।। ৭৭	ইন্দ্রিয়াণাম্‌ অধিষ্ঠাত্রী ভূতানাং চ অখিলেষু যা। ভূতেষু সততং তস্যৈ ব্যাপ্তি-দেব্যৈ নমঃ নমঃ।। ৭৭
চিতিরূপেণ যা কৃৎস্নমেতদ্‌ ব্যাপ্য স্থিতা জগৎ। নমস্তস্যৈ।। ৭৮ নমস্তস্যৈ।। ৭৯ নমস্তস্যৈ নমো নমঃ।। ৮০	চিতিরূপেণ যা কৃৎস্নম্‌ এতৎ ব্যাপ্য স্থিতা জগৎ। নমঃ তস্যৈ।। ৭৮ নমঃ তস্যৈ।। ৭৯ নমঃ তস্যৈ নমঃ নমঃ।। ৮০
স্তুতা সুরৈঃ পূর্বমভীষ্টসংশ্রয়া ত্তথা সুরেন্দ্রেণ দিনেষু সেবিতা। করোতু সা নঃ শুভহেতুরীশ্বরী, শুভাণি ভদ্রাণ্যভিহন্তু চাপদঃ।। ৮১	স্তুতা সুরৈঃ পূর্বম্‌ অভীষ্ট-সংশ্রয়াৎ তথা সুর-ইন্দ্রেণ দিনেষু সেবিতা। করোতু সা নঃ শুভ-হেতুঃ ঈশ্বরী, শুভাণি ভদ্রাণি অভিহন্তু চ আপদঃ।। ৮১
যা সামপ্রতং চোদ্ধতদৈত্যতাপিতৈ রস্মাভিরীশা চ সুরৈর্নমস্যতে। যা চ স্মৃতা তৎক্ষণমেব হন্তি নঃ, সর্ব্বাপদো ভক্তিবিনম্রমূর্ত্তিভিঃ।। ৮২	যা সামপ্রতম্‌ চ উদ্ধত-দৈত্য-তাপিতৈঃ অস্মাভিঃ ঈশা চ সুরৈঃ নমস্যতে। যা চ স্মৃতা তৎক্ষণম্‌ এব হন্তি নঃ, সর্ব-আপদঃ ভক্তি-বিনম্র-মূর্তিভিঃ।। ৮২
ঋষিরুবাচ।। ৮৩ এবং স্তবাদিযুক্তানাং দেবানাং তত্র পার্ব্বতী। স্নাতুমভ্যাযযৌ তোয়ে জাহ্নব্যা নৃপনন্দন।। ৮৪	ঋষিঃ উবাচ।। ৮৩ এবং স্তব-আদি-যুক্তানাং দেবানাং তত্র পার্বতী। স্নাতুম্‌ অভ্যাযযৌ তোয়ে জাহ্নব্যাঃ নৃপ-নন্দন।। ৮৪
সাব্রবীত্তান্‌ সুরান্‌ সুভ্রূর্ভবদ্ভিঃ সতূয়তেহত্র কা। শরীরকোষতশ্চাস্যাঃ সমুদ্ভূতাব্রবীচ্ছিবা।। ৮৫	সা অব্রবীৎ তান্‌ সুরান্‌ সু-ভ্রূঃ-ভবদ্ভিঃ সতূয়তে অত্র কা। শরীর-কোষতঃ চ অস্যাঃ সমুদ্ভূতা অব্রবীৎ শিবা।। ৮৫
স্তোত্রং মমৈতৎ ক্রিয়তে শুম্ভদৈত্যনিরাকৃতৈঃ। দেবৈঃ সমেতৈঃ সমরে নিশুম্ভেন পরাজিতৈঃ।। ৮৬	স্তোত্রং মম্‌ এতৎ ক্রিয়তে শুম্ভ-দৈত্য-নিরাকৃতৈঃ। দেবৈঃ সমেতৈঃ সমরে নিশুম্ভেন পরাজিতৈঃ।। ৮৬
শরীরকোষাদ্ যত্তস্যাঃ পার্ব্বত্যা নিঃসৃতাম্বিকা। কৌষিকীতি সমস্তেষু ততো লোকেষু গীয়তে।। ৮৭	শরীর-কোষাৎ যৎ তস্যাঃ পার্বত্যাঃ নিঃসৃতা অম্বিকা\| কৌষিকী ইতি সমস্তেষু ততঃ লোকেষু গীয়তে।। ৮৭
তস্যাং বিনির্গতায়ান্তু কৃষ্ণাভূৎ সাপি পার্ব্বতী। কালিকেতি সমাখ্যাতা হিমাচল-কৃতাশ্রয়া।। ৮৮	তস্যাং বিনির্গতায়াং তু কৃষ্ণা অভূৎ সা অপি পার্বতী। কালিকা ইতি সমাখ্যাতা হিম-অচল-কৃত-অশ্রয়াঃ।। ৮৮
ততোহম্বিকাং পরং রূপং বিভ্রাণাং সুমনোহরম্। দদর্শ চণ্ডো মুণ্ডশ্চ ভৃত্যৌ শুম্ভ-নিশুম্ভয়োঃ।। ৮৯	ততঃ অম্বিকাং পরং রূপং বিভ্রাণাং সু-মনোহরম্। দদর্শ চণ্ডঃ মুণ্ডঃ চ ভৃত্যৌ শুম্ভ-নিশুম্ভয়োঃ।। ৮৯
তাভ্যাং শুম্ভায় চাখ্যাতা অতীব সুমনোহরা। কাপ্যাস্তে স্ত্রী মহারাজ! ভাসয়ন্তী হিমাচলম্‌।। ৯০	তাভ্যাং শুম্ভায় চ আখ্যাতা অতীব সু-মনোহরা। কা অপি আস্তে স্ত্রী মহারাজ ভাসয়ন্তী হিম-অচলম্‌।। ৯০
নৈব তাদৃক্‌ ক্বচিদ্রূপং দৃষ্টং কেনচিদুত্তমম্‌। জ্ঞায়তাং কাপ্যসৌ দেবী গৃহ্যতাঞ্চাসুরেশ্বর!।। ৯১	ন এব তাদৃক্‌ ক্বচিৎ রূপং দৃষ্টম্‌ কেনচিৎ উত্তমম্‌। জ্ঞায়তাং কা অপি অসৌ দেবী গৃহ্যতাং চ অসুর-ঈশ্বর!।। ৯১
স্ত্রীরত্নমতিচার্ব্বঙ্গী দ্যোতয়ন্তী দিশস্ত্বিষা। সা তু তিষ্ঠতি দৈত্যেন্দ্র! তাং ভবান্‌ দ্রষ্টুমর্হতি।। ৯২	স্ত্রীরত্নম্‌ অতি-চারু-অঙ্গী দ্যোতয়ন্তী দিশঃ ত্বিষা। সা তু তিষ্ঠতি দৈত-ইন্দ্র! তাং ভবান্‌ দ্রষ্টুম্‌ অর্হতি।। ৯২
যানি রত্নানি মণয়ো গজাশ্বাদীনি বৈ প্রভো। ত্রৈলোক্যে তু সমস্তানি সামপ্রতং ভান্তি তে গৃহে।। ৯৩	যানি রত্নানি মণয়ঃ গজ-অশ্ব-আদীনি বৈ প্রভো। ত্রৈলোক্যে তু সমস্তানি সামপ্রতং ভান্তি তে গৃহে।। ৯৩
ঐরাবতঃ সমানীতো গজরত্নং পুরন্দরাৎ। পারিজাততরুশ্চায়ং তথৈবোচ্চৈঃশ্রবা হয়ঃ।। ৯৪	ঐরাবতঃ সমানীতঃ গজ-রত্নং পুরন্দরাৎ। পারিজাত-তরুঃ চ অয়ং তথা এব উচ্চৈঃ শ্রবা হয়ঃ।। ৯৪
বিমানং হংসসংযুক্তমেতত্তিষ্ঠতি তেহঙ্গনে। রত্নভূতমিহানীতং যদাসীদ্‌ বেধসোহদ্ভুতম্‌।। ৯৫	বিমানং হংস-সংযুক্তম্‌ এতৎ তিষ্ঠতি তে অঙ্গনে। রত্ন-ভূতম্‌ ইহ আনীতং যৎ আসীৎ বেধসঃ অদ্ভুতম্‌।। ৯৫
নিধিরেষ মহাপদ্মঃ সমানীতো ধনেশ্বরাৎ। কিঞ্জল্কিনীং দদো চাব্ধির্মালামম্লান-পঙ্কজাম্।। ৯৬	নিধিঃ এষঃ মহাপদ্মঃ সমানীতঃ ধন-ঈশ্বরাৎ। কিঞ্জল্কিনীম্ দদৌ চ অব্ধি মালাম্ অম্লান-পঙ্কজাম্।। ৯৬
ছত্রং তে বারুণং গেহে কাঞ্চনস্রাবি তিষ্ঠতি। তথায়ং স্যন্দনবরো যঃ পুরাসীৎ প্রজাপতেঃ।। ৯৭	ছত্রং তে বারুণং গেহে কাঞ্চনস্রাবি তিষ্ঠতি। তথায়ং স্যন্দনবরো যঃ পুরাসীৎ প্রজাপতেঃ।। ৯৭
মৃত্যোরুৎক্রান্তিদা নাম শক্তিরীশ! ত্বয়া হৃতা। পাশঃ সলিলরাজস্য ভ্রাতুস্তব পরিগ্রহে।। ৯৮	মৃত্যোঃ উৎ-ক্রান্তি-দা নাম শক্তিঃ ঈশ ত্বয়া হৃতা। পাশঃ সলিল-রাজস্য ভ্রাতুঃ তব পরিগ্রহে।। ৯৮
নিশুম্ভস্যাব্ধিজাতাশ্চ সমস্তা রত্নজাতয়ঃ। বহ্নিরপি দদৌ তুভ্যমগ্নিশৌচে চ বাসসী।। ৯৯	নিশুম্ভস্য অব্ধিজাতাঃ চ সমস্তাঃ রত্ন-জাতয়ঃ। বহ্নিঃ অপি দদৌ তুভ্যম্‌ অগ্নি-শৌচে চ বাসসী।। ৯৯
এবং দৈত্যেন্দ্র! রত্নানি সমস্তান্যাহৃতানি তে। স্ত্রীরত্নমেষা কল্যাণী ত্বয়া কস্মান্ন গৃহত্যে।। ১০০	এবং দৈত্য-ইন্দ্র রত্নানি সমস্তানি আহৃতানি তে। স্ত্রী-রত্নম্‌ এষা কল্যাণী ত্বয়া কস্মাৎ ন গৃহত্যে।। ১০০
ঋষিরুবাচ।। ১০১ নিশম্যেতি বচঃ শুম্ভঃ স তদা চণ্ডমুণ্ডয়োঃ। প্রেষয়ামাস সুগ্রীবং দূতং দেব্যা মহাসুরম্‌।। ১০২	ঋষিঃ উবাচ।। ১০১ নিশম্য ইতি বচঃ শুম্ভঃ সঃ তদা চণ্ড-মুণ্ডয়োঃ। প্রেষয়ামাস সুগ্রীবং দূতং দেব্যাঃ মহাসুরম্‌।। ১০২
ইতি চেতি চ বক্তব্যা সা গত্বা বচনান্মম। যথা চাভ্যেতি সংপ্রীত্যা তথা কার্য্যং ত্বয়া লঘু।। ১০৩	ইতি চ ইতি চ বক্তব্যা সা গত্বা বচনাৎ মম। যথা চ অভি-এতি সংপ্রীত্যা তথা কার্য্যং ত্বয়া লঘু।। ১০৩
স তত্র গত্বা যত্রাস্তে শৈলোদ্দেশেহতিশোভনে। সা দেবী তাং ততঃ প্রাহ শক্ষ্ণং মধুরয়া গিরা।। ১০৪	সঃ তত্র গত্বা যত্র আস্তে শৈল-উদ্দেশে অতিশোভনে। সা দেবী তাং ততঃ প্রাহ শক্ষ্ণং মধুরয়া গিরা।। ১০৪
দূত উবাচ।। ১০৫ দেবি! দৈত্যেশ্বরঃ শুম্ভস্ত্রৈলোক্যে পরমেশ্বরঃ। দূতোহহং প্রেষিতস্তেন ত্বৎসকাশমিহাগতঃ।। ১০৬	দূতঃ উবাচ।। ১০৫ দেবি দৈত্য-ঈশ্বর শুম্ভঃ ত্রৈলোক্যে পরম্‌-ঈশ্বরঃ। দূতঃ অহম্‌ প্রেষিত তেন ত্বৎ সকাশম্‌ ইহ আগতঃ।। ১০৬
অব্যাহতাজ্ঞঃ সর্ব্বাসু যঃ সদা দেবযোনিষু। নির্জ্জিতাখিল-দৈত্যারিঃ স যদাহ শৃণুষ্ব তৎ।। ১০৭	অব্যাহত-আজ্ঞঃ সর্বাসু যঃ সদা দেব যোনিষু। নির্জিত-অখিল-দৈত্য-অরিঃ সঃ যৎ আহ শৃণুষ্ব তৎ।। ১০৭
মম ত্রৈলোক্যমখিলং মম দেবা বশানুগাঃ। যজ্ঞভাগানহং সর্ব্বানুপাশ্নামি পৃথক্‌ পৃথক্‌।। ১০৮	মম ত্রৈলোক্যম্‌ অখিলং মম দেবাঃ বশ-অনুগাঃ। যজ্ঞ-ভাগান্‌ অহং সর্বান্‌ উপাশ্নামি পৃথক্‌ পৃথক্‌।। ১০৮
ত্রৈলোক্যে বররত্নানি মম বশ্যান্যশেষতঃ। তথৈব গজরত্নানি হৃত্বা দেবেন্দ্রবাহনম্‌।। ১০৯	ত্রৈলোক্যে বর-রত্নানি মম বশ্যানি অশেষতঃ। তথা এব গজরত্নানি হৃত্বা দেব-ইন্দ্র-বাহনম্‌।। ১০৯
ক্ষীরোদমথনোদ্ভূতমশ্বরত্নং মমামরৈঃ। উচ্চৈঃশ্রবস-সংজ্ঞং তৎ প্রণিপত্য সমর্পিতম্‌।। ১১০	ক্ষীরোদ-মথন-উদ্ভূতম্‌ অশ্ব-রত্নং মম অমরৈঃ। উচ্চৈঃ শ্রবস-সংজ্ঞং তৎ প্রণিপত্য সমর্পিতম্‌।। ১১০
যানি চান্যানি দেবেষু গন্ধর্ব্বেষূরগেষু চ। রত্নভূতানি ভূতানি তানি ময্যেব শোভনে।। ১১১	যানি চ অন্যানি দেবেষু গন্ধর্বেষূ উরগেষু চ। রত্ন-ভূতানি ভূতানি তানি ময়ি এব শোভনে।। ১১১
স্ত্রীরত্নভূতাং ত্বাং দেবি! লোকে মন্যামহে বয়ম্‌। সা ত্বমস্মানুপাগচ্ছ যতো রত্নভুজো বয়ম্‌।। ১১২	স্ত্রী-রত্নভূতাং ত্বাং দেবি লোকে মন্যামহে বয়ম্‌। সা ত্বম অস্মান্‌ উপাগচ্ছ যতঃ রত্ন-ভুজঃ বয়ম্‌।। ১১২
মাং বা মমানুজং বাপি নিশুম্ভমুরুবিক্রমম্‌। ভজ ত্ব চঞ্চলাপাঙ্গি! রত্নভূতাহসি বৈ যতঃ।। ১১৩	মাং বা মম অনু-জং বা অপি নিশুম্ভম্‌ উরু-বিক্রমম্‌। ভজ ত্ব চঞ্চল-অপাঙ্গি! রত্ন-ভূতা অসি বৈ যতঃ।। ১১৩
পরমৈশ্বর্য্যমতুলং প্রাপ্স্যসে মৎপরিগ্রহাৎ। এতদ্‌বুদ্ধ্যা সমালোচ্য মৎপরিগ্রহতাং ব্রজ।। ১১৪	পরম্‌ ঐশ্বর্য্যম্‌ অতুলং প্রাপ্‌স্যসে মৎ-পরিগ্রহাৎ। এতৎ বুদ্ধ্যা সমালোচ্য মৎ-পরিগ্রহতাং ব্রজ।। ১১৪
ঋষিরুবাচ।। ১১৫ ইত্যুক্ত্যা সা তদা দেবী গম্ভীরান্তঃস্মিতা জগৌ। দুর্গা ভগবতী ভদ্রা যয়েদং ধার্য্যতে জগৎ।। ১১৬	ঋষিঃ উবাচ।। ১১৫ ইতি উক্ত্যা সা তদা দেবী গম্ভীরা অন্তঃস্মিতা জগৌ। দুর্গা ভগবতী ভদ্রা যয়া ইদং ধার্য্যতে জগৎ।। ১১৬
দেব্যুবাচ।। ১১৭ সত্যমুক্তং ত্বয়া নাত্র মিথ্যা কিঞ্চিৎ ত্বয়োদিতম্‌। ত্রৈলোক্যাধিপতিঃ শুম্ভোনিশুম্ভশ্চাপি তাদৃশঃ।। ১১৮	দেবী উবাচ।। ১১৭ সত্যম্‌ উক্তং ত্বয়া ন অত্র মিথ্যা কিঞ্চিৎ ত্বয়া উদিতম্‌। ত্রৈলোক্য-অধিপতিঃ শুম্ভঃ নিশুম্ভঃ চ অপি তাদৃশঃ।। ১১৮
কিন্ত্বত্র যৎ প্রতিজ্ঞাতং মিথ্যা তৎ ক্রিয়তে কথম্‌। শ্রূয়তামল্পবুদ্ধিত্বাৎ প্রতিজ্ঞা যা কৃতা পুরা।। ১১৯	কিন্তু অত্র যৎ প্রতিজ্ঞাতং মিথ্যা তৎ ক্রিয়তে কথম্‌। শ্রূয়তাম্‌ অল্প-বুদ্ধিত্বাৎ প্রতিজ্ঞা যা কৃতা পুরা।। ১১৯
যো মাং জয়তি সংগ্রামে যো মে দর্পং ব্যপোহতি। যো মে প্রতিবলো লোকে স মে ভর্ত্তা ভবিষ্যতি।। ১২০	যঃ মাং জয়তি সংগ্রামে যঃ মে দর্পং ব্যপোহতি। যঃ মে প্রতিবলঃ লোকে স মেঃ ভর্তা ভবিষ্যতি।। ১২০
তদাগচ্ছতু শুম্ভোহত্র নিশুম্ভো বা মহাসুরঃ। মাং জিত্বা কিং চিরেণাত্র পাণিং গৃহ্ণাতু মে লঘু।। ১২১	তৎ আগচ্ছতু শুম্ভঃ অত্র নিশুম্ভঃ বা মহাসুরঃ। মাং জিত্বা কিং চিরেণ অত্র পাণিং গৃহ্ণাতু মে লঘু।। ১২১
দূত উবাচ।। ১২২ অবলিপ্তাহসি মৈবং তবং দেবি! ব্রূহি মমাগ্রতঃ। ত্রৈলোক্যে কঃ পুমাংস্তিষ্ঠেদগ্রে শুম্ভ-নিশুম্ভয়োঃ।। ১২৩	দূতঃ উবাচ।। ১২২ অবলিপ্তা অসি মা এবং তবং দেবি ব্রূহি মম অগ্রতঃ। ত্রৈলোক্যে কঃ পুমান্‌ তিষ্ঠেৎ অগ্রে শুম্ভ-নিশুম্ভয়োঃ।। ১২৩
অন্যেষামপি দৈত্যানাং সর্ব্বে দেবা ন বৈ যুধি। তিষ্ঠন্তি সম্মুখে দেবি! কিং পুনঃ স্ত্রী ত্বমেকিকা।। ১২৪	অন্যেষাম অপি দৈত্যানাম্‌ সর্বে দেবা ন বৈ যুধি। তিষ্ঠন্তি সম্মুখে দেবি কিং পুনঃ স্ত্রী ত্বম্‌ একিকা।। ১২৪
ইন্দ্রাদ্যাঃ সকলা দেবাস্তস্থূর্যেষাং ন সংযুগে। শুম্ভাদীনাং কথং তেষাং স্ত্রী প্রয়াস্যসি সম্মুখম্‌।। ১২৫	ইন্দ্র-আদ্যাঃ সকলাঃ দেবাঃ তস্থূঃ যেষাং ন সংযুগে। শুম্ভ আদীনাং কথং তেষাং স্ত্রী প্রয়াস্যসি সম্মুখম্‌।। ১২৫
সা ত্বং গচ্ছ ময়ৈবোক্তা পার্শ্বং শুম্ভ-নিশুম্ভয়োঃ। কেশাকর্ষণ-নির্দ্ধূতগৌরবা মা গমিষ্যসি।। ১২৬	সা ত্বং গচ্ছ ময়া এব উক্তা পার্শ্বং শুম্ভ-নিশুম্ভয়োঃ। কেশ-আকর্ষণ-নির্ধূত-গৌরবা মা গমিষ্যসি।। ১২৬
দেব্যুবাচ।। ১২৭ এবমেতদ্‌ বলী শুম্ভো নিশুম্ভশ্চাতিবীর্য্যবান্‌। কিং করোমি প্রতিজ্ঞা মে যদনালোচিতা পুরা।। ১২৮	দেবী উবাচ।। ১২৭ এবম্‌ এতৎ বলী শুম্ভঃ নিশুম্ভঃ চ অতি-বীর্যবান্‌। কিং করোমি প্রতিজ্ঞা মে যৎ অনালোচিতা পুরা।। ১২৮
স ত্বং গচ্ছ ময়োক্তং তে যদেতৎ সর্ব্বমাদৃতঃ। তদাচক্ষ্বাসুরেন্দ্রায় স চ যুক্তং করোতু যৎ।। ১২৯	স ত্বং গচ্ছ ময়া উক্তম্‌ তে যৎ এতৎ সর্বম্‌ আদৃতঃ। তৎ আচক্ষ্ব অসুর-ইন্দ্রায় সঃ চ যুক্তং করোতু যৎ।। ১২৯
ইতি মার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে দেব্যা দূতসংবাদঃ।। ৫ম অঃ।।