দ্বাদশঃ অধ্যায়ঃ
ওঁ নমশ্চণ্ডিকায়ৈ।
ভগবতীবাক্য

মূল

পাঠ সংকেত

দেব্যুবাচ।। ১
এভিঃ স্তবৈশ্চ মাং নিত্যং স্তোষ্যতে যঃ সমাহিতঃ।
তস্যাহং সকলাং বাধাং নাশয়িষ্যাম্যসংশয়ম্‌।। ২

দেবী উবাচ।। ১
এভিঃ স্তবৈঃ চ মাং নিত্যং স্তোষ্যতে যঃ সমাহিতঃ।
তস্য অহং সকলাং বাধাং নাশয়িষ্যামি অসংশয়ম্‌‌।। ২

মধুকৈটভনাশঞ্চ মহিষাসুর-ঘাতনম্‌।
কীর্ত্তয়িষ্যন্তি যে তদ্বদ্‌ বধং শুম্ভনিশুম্ভয়োঃ।। ৩

মধু-কৈটভ-নাশং চ মহিষাসুর-ঘাতনম্‌।
কীর্তয়িষ্যন্তি যে তৎ বৎ বধং শুম্ভ-নিশুম্ভয়োঃ।। ৩

অষ্টম্যাঞ্চ চতুর্দ্দশ্যাং নবম্যাঞ্চৈকচেতসঃ।
শ্রোষ্যন্তি চৈব যে ভক্ত্যা মম মাহাত্ম্যমুত্তমম্‌।। ৪

অষ্টম্যাং চ চতুর্দশ্যাং নবম্যাং চ এক চেতসঃ।
শ্রোষ্যন্তি চ এব যে ভক্ত্যা মম মাহাত্ম্যম্‌ উত্তমম্‌।। ৪

ন তেষাং দুষ্কৃতং কিঞ্চিদ্‌ দুষ্কৃতোত্থা ন চাপদঃ।
ভবিষ্যতি ন দারিদ্র্যং ন চৈবেষ্ট-বিয়োজনম্‌।। ৫

ন তেষাং দুষ্কৃতং কিঞ্চিৎ দুষ্কৃত-উত্থা ন চ আপদঃ।
ভবিষ্যতি ন দারিদ্র্যং ন চ এব ইষ্ট-বিয়োজনম্‌।। ৫

শত্রুতো ন ভয়ং তস্য দস্যুতো বা ন রাজতঃ।
ন শস্ত্রানল-তোয়ৌঘাৎ কদাচিৎ সম্ভবিষ্যতি।। ৬

শত্রুতঃ ন ভয়ং তস্য দস্যুতঃ বা ন রাজতঃ।
ন শস্ত্র-অনল-তোয়-ওঘাৎ কদাচিৎ সম্ভবিষ্যতি।। ৬

তস্মান্মমৈতন্মাহাত্ম্যং পঠিতব্যং সমাহিতৈঃ।
শ্রোতব্যঞ্চ সদা ভক্ত্যা পরং স্বস্ত্যয়নং হি তৎ।। ৭

তস্মাৎ মম এতৎ মাহাত্ম্যং পঠিতব্যং সমাহিতৈঃ।
শ্রোতব্যং চ সদা ভক্ত্যা পরং স্বস্তি-অয়নং হি তৎ।। ৭

উপসর্গানশেষাংস্তু মহামারী-সমুদ্ভবান্‌।
তথা ত্রিবিধমুৎপাতং মাহাত্ম্যং শময়েন্মম।। ৮

উপসর্গান্‌ অশেষান্‌ তু মহামারী-সমুদ্ভবান্‌।
তথা ত্রি-বিধম্‌ উৎপাতং মাহাত্ম্যং শময়েৎ মম।। ৮

যত্রৈতৎ পঠ্যতে সম্যঙ্‌ নিত্যমায়তনে মম।
সদা ন তদ্‌ বিমোক্ষ্যামি সান্নিধ্যং তত্র মে স্থিতম্‌।। ৯

যত্র এতৎ পঠ্যতে সম্যক্‌ নিত্য্‌ আয়তনে মম।
সদা ন তৎ বিমোক্ষ্যামি সান্নিধ্যং তত্র মে স্থিতম্‌।। ৯

বলিপ্রদানে পূজায়ামগ্নিকার্য্যে মহোৎসবে।
সর্ব্বং মমৈতচ্চরিতমুচ্চার্য্যং শ্রাব্যমেব চ।। ১০

বলি-প্রদানে পূজায়াম্‌ অগ্নি-কার্য্যে মহা-উৎসবে।
সর্বং মম এতৎ চরিতম্‌ উচ্চার্যং শ্রাব্যম্‌ এব চ।। ১০

জানতাজানতা বাপি বলিপূজাং তথা কৃতাম্‌।
প্রতীচ্ছিষ্যাম্যহং প্রীত্যা বহ্নিহোমং তথা কৃতম্‌।। ১১

জানতা অজানতা বা অপি বলি-পূজাং তথা কৃতাম্‌।
প্রতীচ্ছিষ্যামি অহং প্রীত্যা বহ্নি-হোমং তথা কৃতম্‌।। ১১

শরৎকালে মহাপূজা ক্রিয়তে যা চ বার্ষিকী।
তস্যাং মমৈতন্মাহাত্ম্যং শ্রুত্বা ভক্তি-সমন্বিতঃ|| ১২

শরৎ-কালে মহাপূজা ক্রিয়তে যা চ বার্ষিকী।
তস্যাং মম এতৎ মাহাত্ম্যং শ্রুত্বা ভক্তি সমন্বিতঃ|| ১২

সর্ব্ববাধাবিনির্ম্মুক্তো ধনধান্যসুতান্বিতঃ।
মনুষ্যো মৎপ্রসাদেন ভবিষ্যতি ন সংশয়।। ১৩

সর্ব-আবাধা-বিনির্মুক্তঃ ধন-ধান্য-সুত-অন্বিতঃ।
মনুষ্যঃ মৎ-প্রসাদেন ভবিষ্যতি ন সংশয়ঃ।। ১৩

শ্রুত্বা মমৈতন্মাহাত্ম্যং তথা চোৎপত্তয়ঃ শুভাঃ।
পরাক্রমঞ্চ যুদ্ধেষু জায়তে নির্ভয়ঃ পুমান্‌।। ১৪

শ্রুত্বা মম এতৎ মাহাত্ম্যং তথা চ উৎপত্তয়ঃ শুভাঃ।
পরাক্রমং চ যুদ্ধেষু জায়তে নির্ভয়ঃ পুমান্‌।। ১৪

রিপবঃ সংক্ষয়ং যান্তি কল্যাণঞ্চোপপদ্যতে।
নন্দতে চ কুলং পুংসাং মাহাত্ম্যং মম শৃণ্বতাম্।। ১৫

রিপবঃ সংক্ষয়ং যান্তি কল্যাণং চ উপপদ্যতে।
নন্দতে চ কুলং পুংসাং মাহাত্ম্যং মম শৃণ্বতাম্।। ১৫

শান্তিকর্ম্মণি সর্ব্বত্র তথা দুঃস্বপ্নদর্শনে।
গ্রহপীড়াসু চোগ্রাসু মাহাত্ম্যং শৃণুয়ান্মম।। ১৬

শান্তি-কর্ম্মণি সর্বত্র তথা দুঃ-স্বপ্ন-দর্শনে।
গ্রহ-পীড়াসু চ উগ্রাসু মাহাত্ম্যং শৃণুয়াৎ মম।। ১৬

উপসর্গাঃ শমং যান্তি গ্রহপীড়াশ্চ দারুণাঃ।
দুঃস্বপ্নঞ্চ নৃভির্দৃষ্টং সুস্বপ্নমুপজায়তে।। ১৭

উপসর্গাঃ শমং যান্তি গ্রহ-পীড়াঃ চ দারুণাঃ।
দুঃ-স্বপ্নং চ নৃভিঃ দৃষ্টং সু-স্বপ্নং উপজায়তে।। ১৭

বালগ্রহাভিভূতানাং বালানাং শান্তিকারকম্‌।
সংঘাতভেদে চ নৃণাং মৈত্রীকরণমুত্তমম্‌।। ১৮

বাল-গ্রহ-অভিভূতানাং বালানাং শান্তি-কারকম্‌।
সংঘাত-ভেদে চ নৃণাং মৈত্রী-করণম্‌ উত্তমম্‌।। ১৮

দুর্ব্বৃত্তানামশেষাণাং বলহানিকরং পরম।
রক্ষোভূতপিশাচানাং পঠনাদেব নাশনম্‌।। ১৯

দুর্বৃত্তানাম্‌ অশেষাণাং বল-হানি-করং পরম্‌।
রক্ষঃ-ভূত-পিশাচানাং পঠনাৎ এব নাশনম্‌।। ১৯

সর্ব্বং মমৈতন্মাহাত্ম্যং মম সন্নিধিকারকম্‌।
পশুপুষ্পার্ঘ্যধূপৈশ্চ গন্ধদীপৈস্তথোত্তমৈঃ।। ২০

সর্বং মম এতৎ মাহাত্ম্যং মম সন্নিধি-কারকম্‌।
পশু-পুষ্প-অর্ঘ্য-ধূপৈঃ চ গন্ধ-দীপৈঃ তথা উত্তমৈঃ।। ২০

বিপ্রাণাং ভোজনৈর্হোমৈঃ প্রোক্ষণীয়ৈরহর্নিশম্‌।
অন্যৈশ্চ বিবিধৈর্ভোগৈঃ প্রদানৈর্ব্বৎসরেণ যা।। ২১

বিপ্রাণাং ভোজনৈঃ হোমৈঃ প্রোক্ষণীয়ৈঃ অহর্নিশম্‌।
অন্যৈঃ চ বিবিধৈঃ ভোগৈঃ প্রদানৈঃ বৎসরেণ যা।। ২১

প্রীতির্ম্মে ক্রিয়তে সাস্মিন্‌ সকৃৎ সুচরিতে শ্রুতে।
শ্রুতং হরতি পাপানি তথারোগ্যং প্রযচ্ছতি।। ২২

প্রীতিঃ মে ক্রিয়তে সাস্মিন্‌ সকৃৎ সু-চরিতে শ্রুতে।
শ্রুতং হরতি পাপানি তথা আরোগ্যং প্রযচ্ছতি।। ২২

প্রীতিঃ মে ক্রিয়তে সাস্মিন্‌ সকৃৎ সু-চরিতে শ্রুতে।
শ্রুতং হরতি পাপানি তথা আরোগ্যং প্রযচ্ছতি।। ২২

রক্ষাং করোতি ভূতেভ্যঃ জন্মনাং কীর্তনং মম।
যুদ্ধেষু চরিতং যৎ মে দুষ্ট-দৈত্য-নিবর্হণম্‌।। ২৩

তস্মিন্‌ শ্রুতে বৈরিকৃতং ভয়ং পুংসাং ন জায়তে।
যুষ্মাভিঃ স্তুতয়ো যাশ্চ যাশ্চ ব্রহ্মর্ষিভিঃ কৃতাঃ।। ২৪

তস্মিন্‌ শ্রুতে বৈরি-কৃতং ভয়ং পুংসাং ন জায়তে।
যুষ্মাভিঃ স্তুতয়ঃ যাশ্চ যাঃ চ ব্রহ্ম-ঋষিভিঃ কৃতাঃ।। ২৪

ব্রহ্মণা চ কৃতাস্তাস্তু প্রযচ্ছন্তি শুভাং মতিম্‌।
অরণ্যে প্রান্তরে বাপি দাবাগ্নি-পরিবারিতঃ।। ২৫

ব্রহ্মণা চ কৃতাঃ তাঃ তু প্রযচ্ছন্তি শুভাং মতিম্‌।
অরণ্যে প্রান্তরে বা অপি দাব-অগ্নি-পরিবারিতঃ।। ২৫

দস্যুভির্বা বৃতঃ শূন্যে গৃহীতো বাপি শত্রুভিঃ।
সিংহব্যাঘ্রানুযাতো বা বনে বা বনহস্তিভিঃ।। ২৬

দস্যুভিঃ বা বৃতঃ শূন্যে গৃহীতঃ বা অপি শত্রুভিঃ।
সিংহ-ব্যাঘ্র-অনুযাতঃ বা বনে বা বন-হস্তিভিঃ।। ২৬

রাজ্ঞা ক্রুদ্ধেন বাজ্ঞপ্তো বধ্যো বন্ধগতোহপি বা।
আঘূর্ণিতো বা বাতেন স্থিতঃ পোতে মহার্ণবে।। ২৭

রাজ্ঞা ক্রুদ্ধেন বা আজ্ঞপ্তঃ বধ্যঃ বন্ধ-গতঃ অপি বা।
আঘূর্ণিতঃ বা বাতেন স্থিতঃ পোতে মহা-অর্ণবে।। ২৭

পতৎসু বাপি শস্ত্রেষু সংগ্রামে ভৃশদারুণে।
সর্ব্বাবাধাসু ঘোরাসু বেদনাভ্যর্দ্দিতোহপি বা।। ২৮

পতৎসু বা অপি শস্ত্রেষু সংগ্রামে ভৃশ-দারুণে।
সর্ব-আবাধাসু ঘোরাসু বেদনা-অভ্যর্দিতঃ অপি বা।। ২৮

স্মরন্‌ মমৈতচ্চরিতং নরো মুচ্যেত সঙ্কটাৎ।
মম প্রভাবাৎ সিংহাদ্যা দস্যবো বৈরিণস্তথা।। ২৯

স্মরন্‌ মম্‌ এতৎ চরিতং নরঃ মুচ্যেত সঙ্কটাৎ।
মম প্রভাবাৎ সিংহ-আদ্যাঃ দস্যবঃ বৈরিণঃ তথা।। ২৯

দূরাদেব পলায়ন্তে স্মরতশ্চরিতং মম।। ৩০

দূরাৎ এব পলায়ন্তে স্মরতঃ চরিতং মম।। ৩০

ঋষিরুবাচ।। ৩১
ইত্যুক্ত্বা সা ভগবতী চণ্ডিকা চণ্ডবিক্রমা।
পশ্যতামেব দেবানাং তত্রৈবান্তরধীয়ত।। ৩২

ঋষিঃ উবাচ।। ৩১
ইতি উক্ত্বা সা ভগবতী চণ্ডিকা চণ্ড-বিক্রমা।
পশ্যতাম্‌ এব দেবানাং তত্র এব অন্তঃ অধীয়ত।। ৩২

তেহপি দেবা নিরাতঙ্কাঃ স্বাধিকারান্ যথা পুরা।
যজ্ঞভাগভুজঃ সর্ব্বে চক্রূর্বিনিহতারয়ঃ।। ৩৩

তে অপি দেবাঃ নিঃ আতঙ্কাঃ স্ব-অধিকারান্ যথা পুরা।
যজ্ঞ-ভাগ-ভুজঃ সর্বে চক্রূঃ বিনিহত-অরয়ঃ।। ৩৩

দৈত্যাশ্চ দেব্যা নিহতে শুম্ভে দেবরিপৌ যুধি।
জগদ্‌বিধ্বংসিনি তস্মিন্‌ মহোগ্রেহতুলবিক্রমে।। ৩৪

দৈত্যাঃ চ দেব্যা নিহতে শুম্ভে দেব-রিপৌ যুধি।
জগৎ-বিধ্বংসিনি তস্মিন্‌ মহা-উগ্রে অতুল বিক্রমে।। ৩৪

নিশুম্ভে চ মহাবীর্য্যে শেষাঃ পাতালমাযযূঃ।। ৩৫

নিশুম্ভে চ মহাবীর্যে শেষাঃ পাতালম্‌ আযযূঃ।। ৩৫

এবং ভগবতী দেবী সা নিত্যাপি পুনঃ পুনঃ।
সম্ভূয় কুরুতে ভূপ! জগতঃ পরিপালনম্‌।। ৩৬

এবং ভগবতী দেবী সা নিত্যা অপি পুনঃ পুনঃ।
সম্ভূয় কুরুতে ভূ-প জগতঃ পরিপালনম্‌।। ৩৬

তয়ৈতন্মোহ্যতে বিশ্বং সৈব বিশ্বং প্রসূয়তে।
সা যাচিতা চ বিজ্ঞানং তুষ্টা ঋদ্ধিং প্রযচ্ছতি।। ৩৭

তয়া এতৎ মোহ্যতে বিশ্বং সা এব বিশ্বং প্রসূয়তে।
সা অযাচিতা চ বিজ্ঞানং তুষ্টা ঋদ্ধিং প্রযচ্ছতি।। ৩৭

ব্যাপ্তং তয়ৈতৎ সকলং ব্রহ্মাণ্ডং মনুজেশ্বর।
মহাকাল্যা মহাকালে মহামারী-স্বরূপয়া।। ৩৮

ব্যাপ্তং তয়া এতৎ সকলং ব্রহ্ম-অণ্ডং মনু-জ-ঈশ্বর।
মহাকাল্যা মহাকালে মহামারী-স্বরূপয়া।। ৩৮

সৈব কালে মহামারী সৈব সৃষ্টির্ভবত্যজা।
স্থিতিং করোতি ভূতানাং সৈব কালে সনাতনী।। ৩৯

সা এব কালে মহামারী সা এব সৃষ্টিঃ ভবতি অজা।
স্থিতিং করোতি ভূতানাং সা এব কালে সনাতনী।। ৩৯

ভবকালে নৃণাং সৈব লক্ষ্মীর্বৃদ্ধিপ্রদা গৃহে।
সৈবাভাবে তথালক্ষ্মীর্বিনাশায়োপজায়তে।। ৪০

ভব-কালে নৃণাং সা এব লক্ষ্মীঃ বৃদ্ধি-প্রদা গৃহে।
সা এব অভাবে তথা অলক্ষ্মীঃ বিনাশায় উপজায়তে।। ৪০

স্তুতা সম্পূজিতা পুষ্পৈর্ধূপগন্ধাদিভিস্তথা।
দদাতি বিত্তং পুত্রাংশ্চ মতিং ধর্ম্মে গতিং শুভাম্‌।। ৪১

স্তুতা সং পূজিতা পুষ্পৈঃ ধূপ-গন্ধ-আদিভিঃ তথা।
দদাতি বিত্তং পুত্রান্‌ চ মতিং ধর্মে গতিং শুভাম্‌।। ৪১

ইতি মার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
ফলস্তুতিঃ সমাপ্ত।। ১২ম অঃ।।